खोज

नवलपुर, ९ असार ।

पुर्वी नवलपरासीको नेपाल प्रेस युनियन नवलपुर शाखाले नेपाल पत्रकार महासंघ नवलपुरको कार्यालयमा तालाबन्दी गरेको छ ।

पत्रकार महासंघको सदस्य शुद्धीकरण विधान अनुसार गर्न र सदस्यता शुद्विकरण उपर भएको मनपरी अन्त्य गर्नुपर्ने माग राख्दै महासंघ नवलपुरको नयाँ भवनमा ताला लगाएको प्रेस युनियन नवलपुरका अध्यक्ष खगराज सापकोटाले बताए । कावासोती स्थित महासंघको नयाँ भवनमा शनिवार बिभिन्न ८ वटा माग राख्दै युनियनले कालो ब्यानर सहित मूलगेटमै ताला लगाएको हो ।

नेपाल पत्रकार महासंघले सार्वजनिक गरेको मतदाता नामावाली प्रति आफ्नो गम्भीर ध्यानाकर्षण भएको भन्दै युनियनले सक्रिय पत्रकारहरुलाई बाहिर राखेर निश्चित समूहको स्वार्थमा जिल्ला र प्रदेशको सिफारिस विना थपघट, जिल्लाको सहमति विना स्थानान्तरण गरी सार्वजनिक गरिएको सदस्यता अन्यायपूर्ण रहेको जनाएको छ ।

“महासंघको विधान अनुसार शाखा र प्रदेश समितिले पठाएको सदस्य सूचीलाई बेवास्ता गर्दै विधि, प्रक्रिया, विधान मिचेर सार्वजनिक भएको सदस्यता सूची प्रेस युनियन नवलपुर अस्वीकार गर्दछ”–युनियनले भनेको छ । नेपाल पत्रकार महासंघका जिल्ला र प्रदेशका अधिकारलाई कुल्चिदै जिल्ला र प्रदेशको अस्तित्व समेत निमिट्यान्न पार्न खोजिएको प्रति नेपाल प्रेस युनियन नवलपुरले आपत्ति जनाएको छ ।

महासंघको विधान र महाधिवेशनको म्यान्डेट अनुसार शाखाबाट सिफारिस भएका सदस्य सूचीलाई महासंघकै संगठन समिति र शुद्धीकरण समितिको संलग्नता विना नै गलत वाटोबाट नामावली तयार गरी सार्वजनिक गरिएकोले प्रेस युनियन नवलपुरलाई त्यो कुनैपनि हालतमा मान्य नहुने पनि युनियनको ज्ञापनपत्रमा उल्लेख छ । विधि, विधान, प्रक्रिया अनुसार नेपाल पत्रकार महासंघकै शाखाहरु र प्रदेश समितिले पठाएको सदस्यता कायम गर्न यूनियन नवलपपुरले ज्ञापनपत्रमा माग गरेको छ ।

नेपाल प्रेस युनियन नवलपुर सदैव नेपाल पत्रकार महासंघको पक्षमा वकालत, सहकार्य र शुद्धिकरणको पक्षमा रहँदा रहँदै नियोजित, अमुक व्यक्तिको स्वार्थ सिद्ध र राजनैतिक पुर्वाग्रहका आधारमा गरिएको नाम मात्रको शुद्धिकरणको कुनै औचित्य नभएकोले नेपाल पत्रकार महासंघको निर्वाचन प्रक्रिया स्थगित गरी निर्णय सच्याउन युनियनले ध्यानाकर्षण गराएको छ ।

नेपाल प्रेस युनियन नवलपुरको माग विपरित अधिवेशन÷ साधारणसभा सहितका कुनै पनि प्रकृया अगाडी बढाएमा त्यसबाट उत्पन्न हुन जाने परिस्थितिको जवाफदेही स्वयं महासंघ नै हुने ज्ञापन पत्रमा उल्लेख गरिएको छ ।

पत्रकार महासंघले सार्वजनिक गरेको नामावली नसच्याई, सदस्यतालाई पूर्णता नदिई साधारणसभा र अधिवेशन लगायतका कुनै पनि कार्यक्रम अगाडि नबढाउन भन्दै पत्रकार महासंघ नवलपुरका अध्यक्ष विरेन्द्र पराजुलीलाई ज्ञापन पत्र बुझाइएको हो ।