खोज

बिगत केही दिनदेखि अत्यधिक मात्रामा बढ्दै गएको गर्मीको कारण जनजीवन निकै प्रभावित बनिरहेको छ । त्यसकारण उच्च गर्मी र लु बाट जोगिन निम्न अनुसारका उपायहरु अपनाउन आम जनमानसलाई अनुरोध छ ।

–तातो हावा लु बाट हुने सम्भावित असरहरुमा थकाई लाग्ने, कमजोरी हुने, बढी तिर्खा लाग्ने, टाउको दुख्ने, खुट्टा बाँउडिने, चक्कर आउने, बेहोस हुने, मांसपेशीहरु दुख्ने, बान्ता हुने जस्ता लक्षणहरु देखिन सक्ने भएकाले यस्ता समस्या देखिएमा नजिकको स्वास्थ्यकर्मी वा स्वास्थ्य संस्थामा तुरुन्त सम्पर्कमा रही आफ्ना समस्याको समाधानको लागि थप सल्लाह सुझाव लिने गर्नु पर्दछ ।

–उच्च गर्मी तापक्रम र लु बाट बच्नको लागि अत्यधिक गर्मीको समयमा घरभित्र अर्थात चिसो स्थानमा बस्नु पर्दछ ।

–नियमित रुपमा पानी तथा झोलिलो पदार्थ फलफुलको रस, जुस तथा सर्वत प्रशस्त मात्रामा पिउनु पर्दछ ।

–खेतबारीमा तथा अन्य मेलापातका कामहरु सकभर बिहान वा बेलुकाको समय मिलाएर गर्नु पर्दछ ।

–सम्भव भएसम्म रुखको छहारी मुनि, शितल ठाँउमा, चिसो ठाउँमा वा पँखा भएको ठाउँमा बस्नु पर्दछ ।

–उच्चगर्मी तापक्रम र लु बाट जोगिनको लागि चिसो पानीले नुहाउने, आवश्यकता अनुसार चिसो पानी पट्टीको प्रयोग गर्नुपर्दछ ।

–उच्चगर्मी तापक्रम र लु बाट बच्नको लागि सकभर दिउँसोको समयमा घर अफिसबाट बाहिर ननिस्कने, यदि बाहिर निस्कनै परेमा पातलो कपडाले टाउको छोप्ने, हल्का तथा सुतिका कपडा लगाउने, टोपी लगाउने वा छाताको प्रयोग गर्ने ।

–मदिरा सेबन, चियाकफी, सोडा जस्ता पेय पदार्थ, चिनीको मात्रा बढी भएका झोल पदार्थ सकभर प्रयोग नगर्ने ।

–लामो समय सम्म फ्रिजमा राखिएका खाद्यपदार्थहरु, धेरै चिसो बनाएर राखेको पानी, कोक फेन्टाहरुको प्रयोग पनि सकभर नगर्ने ।

–गर्मीको समयमा बिहान वा बेलुका एक पटक पकाएर फ्रिजमा राखेको दालभात, रोटी तरकारी जस्ता खाद्य पदार्थहरु साँझ बिहान प्रयोग नगर्ने । जस्ता सावधानी अपनायौं भने उच्च गर्मी तापक्रम वा लु लाग्ने समस्याबाट घरयासी तहबाटै बच्न वा जोगिन सकिन्छ ।