खोज

तिलोत्तमा,३२ जेठ । तिलोत्तमा नगरपालिकाको सामाजिक विकास समितिले अटिजम सम्बन्धी सचेतनामूलक कार्यक्रम गरेको छ । सामुदायिक विद्यालयका प्रधानाध्यापक, नगरभित्रका स्वास्थ्य संस्थाका कर्मचारी र अटिजमको समस्या भएका बालबालिकाका अभिभावकलाई अटिजमबारे जानकारी गराउन कार्यक्रम गरिएको हो । स्नायुमा हुने गम्भीर खराबीका कारण बालबालिकामा अटिजमको समस्या देखिने र यो जन्मजात समस्या हो । सो अवसरमा बोल्दै नगरपालिकाका सामाजिक विकास समिति संयोजक रवि सेन्चुरीले अटिजमको समस्या भएका बालबालिकाको क्षमता विकास, सम्मानपुर्वक बांच्न पाउने अधिकार सुनिश्चित गर्न पहिलोपटक वजेटमै उल्लेख गरेर यो कार्यक्रम गरिएको बताए ।
कार्यक्रममा अटिजम रोग विशेषज्ञ डा। जस्मिनले स्नायुमा हुने गम्भीर खराबीका कारण बालबालिकामा अटिजमको समस्या देखिने र यो जन्मजात समस्या भएको बताइन् । यो समस्याले बालबालिकामा बौद्धिक र शारिरिक अपांगता हुन्छ । हरेक ५० जना बालबालिकामा एक जनालाई कुनै न कुनै प्रकारको अटिजमको समस्या हुने भन्दै डा. जस्मिनले माया,सद्भाव र प्रेमपुर्वक व्यवहारबाट उनीहरुलाई खुशी बनाउन सकिने बताइन् ।

अटिजम भएका बालबालिकामा पनि कुनै एक विशेष क्षमता हुने भएकाले त्यसलाई पहिचान गरी उनीहरुलाई प्रशिक्षण दिएमा आत्मनिर्भर बन्न सक्ने संभावना समेत हुने बताइन् । नगरपालिकाका स्वास्थ्य शाखा प्रमुख ज्ञानप्रसाद पौडेलले नगरभित्रका अटिजमको समस्या भएका बालबालिकाहरु भएका घर पत्ता लगाएर उनीहरुका पक्षमा काम गर्ने र उनीहरुलाई अपहेलित हुन नदिन शिक्षक,अभिभावक र स्वास्थ्यकर्मीलाई यस्ता कार्यक्रम निरन्तरता दिइने बताए । कार्यक्रममा नगरपालिकाका जनस्वास्थ्य निरीक्षक केशव भट्टराईले स्पीच थेरापी, फिजियो थेरापी आदि उपचार विधिबाट अटिजमको समस्या कम गर्न सकिने र उनीहरुलाई परिवारका अभिभावक र समाजको माया र सद्भाव महत्वपूर्ण हुने बताए ।