खोज

बुटवल, २९ जेठ । अस्पतालमा उपचार गर्न आउने बिरामीका आफन्तलाई रगतको जोहो गर्न धेरै कठिन हुने गरेको छ । अझ दुरदराजबाट उपचारमा आएका बिरामीका आफन्तहरु रगत कहाँ पाइन्छ, कसरी लिने र मूल्य तिर्नुपर्ने हो वा निःशुल्क जस्ता धेरै कुराको ज्ञान हँुदैन । यस्तोमा बिरामीहरुलाई सहज हुने गरी अस्पताल परिसरमा नै ब्लड बैक स्थापना गर्न सके बिरामी र बिरामीका आफन्तलाई सहज हुने देखिन्छ । बुटवलको ब्लड बैकमा संकलन हुने रगत मध्ये सबैभन्दा धेरै खपत हुने लुम्बिनी प्रादेशिक अस्पतालमा आफ्नै ब्लड बैंक स्थापना गर्न रुपन्देहीका रक्तदाताहरुले नवनियुक्त मेडिकल सुपरिटेन्टेन्ड डा. ईन्द्र ढकाललाई माग गरेका छन् । नेपाल स्वयंसेवी रक्तदाता समाज रुपन्देही शाखाले मंगलबार अस्पतालमा परिसरमा नवनियुक्त मेसु डा. ईन्द्र ढकाललाई शुभकामना तथा बधाई कार्यक्रम गरी बिरामीहरुलाई सहजताका लागि आफ्नै ब्लड बैंक खोल्न माग गरेका हुन् ।

कार्यक्रममा नेपाल स्वयंसेवी रक्तदाता समाज रुपन्देही जिल्ला शाखाका अध्यक्ष कृष्ण चौहान क्षेत्री, उपाध्यक्ष उदयराज भट्टराई, तिलोत्तमा शाखाका महासचिव सागर पाठक, भेषराज आचार्य, प्रेस सल्लाहकार स्वस्तिक श्रेष्ठले नवनियुक्त मेसु डा. ईन्द्र ढकाललाई मायाको चिनो र खादाबाट सम्मान गरेका थिए ।

कार्यक्रममा नेपाल स्वयंसेवी रक्तदाता समाज, रुपन्देही जिल्ला शाखाका अध्यक्ष कृष्ण चौहान क्षेत्रीले प्रादेशिक अस्पतालमा ब्लड बैक खोल्न सकिने धेरै सम्भावना रहेको बताए । रक्तसंचार नीति २०७१ मा जारी भएसंगै नेपाल सरकारले स्वास्थ्य मन्त्रालय अन्तर्गत ब्लड ब्युरो गठन गरी रक्तजन्य कार्यको ब्यवस्थापन गर्ने जिम्मेवारी दिएको भन्दै उनले एक सय बेड भएका अस्पताल आफ्नै ब्लड बैक खोल्न पाउने प्रावधान रहेको बताए ।

ल्याबको गुणस्तर अनुसार ए देखि ई सम्मका ब्लड बैक खोल्न सकिने उनले बताए । हाल नेपाल रेडक्रस सोसाईटीद्वारा संचालनमा रहेको ब्लड बैकले रगतको मागलाई थेग्न नसकेको बेला ठुलो अस्पताल आफनै संचालनमा ल्याउनु बिरामीहरुलाई धेरै राम्रो हुने उनको तर्क छ । ‘यसअघि नै भिम अस्पतालमा आफनै ब्लड बैक संचालनमा आएको छ’—उनले भने ।
भैरहवा मेडिकल कलेजमा समेत ब्लड बैकको युनिट छ । अस्पतालभित्र नै ब्लड बैक संचालन गर्ने सके यसबाट बिरामीहरुलाई सहजता मिल्ने उनले बताए । अस्पतालमा खपत गर्ने रगतको एक तिहाई रगत सोधभर्ना गर्ने गरेको उनले बताए ।

कार्यक्रममा लुम्बिनी प्रादेशिक अस्पताल मेसु डा. ईन्द्र ढकालले धेरै राम्रो विषय उठान भएको भन्दै यस विषयमा छिट्टै काम गरिने बताए । अघिल्लो कार्यकालमा समेत ब्लड डिस्प्याज सेन्टर र ब्लड बैक राख्ने विषयमा लामो छलफल भएको भन्दै उनले जनशक्ति र उपकरणलाई ब्यवस्थापन गरेर आवश्यक निर्णय गरिने बताए । प्रक्रिया पूरा गरेर काम गर्नतर्फ अघि बढ्ने प्रतिवद्धता जनाउँदै उनले आईसियु स्थापना भएको करिब ६ वर्षपछि पुर्ण रुपमा संचालनमा आएको उदाहरण पेश गरे ।