खोज

बुटवल, १९ जेठ । रुपन्देहीमा सम्पन्न एसईई खुल्ला डान्स प्रतियोगिता २०८१ को उपाधि ज्ञानज्योति विद्यालयबाट एसईई दिएकी मन्जिता रानाले जितेकी छिन । शुक्रबार भएको फाईनलमा अन्य ३२ समुहलाई पछि पार्दै उनले उपाधि चुमेकी हुन । उपाधिसंगै उनले नगद १५ हजार, मेडल तथा प्रमाणपत्रबाट पुरस्कृत भईन । गुगल इन्सिच्युटकी स्वीकृति खत्री र स्वीकृति गुप्ता द्वितीय हुदै दस हजार, तिनाउ बोडिङ्गकी निस्था पुन मगर तृतीय हुदै सात हजार रुपैया तथा होराइजन मा.वि र कालिका मानवज्ञान मा विका किरण भण्डारी मगर र जेनिसा मगर सान्त्वना हुदै तीन हजार रुपैया, मेडल तथा प्रमाणपत्रद्वारा पुरस्कृत भए ।

एक समारोहका बिच विजेता, उपविजेताहरुलाई नृत्य संघ लुम्बिनी प्रदेशका अध्यक्ष लोकेन्द्र शाह, विद्यालयका अध्यक्ष दुर्गादत्त भण्डारी, क्याम्पस प्रमुख मनोज मरासिनी, क्याम्पस अध्यक्ष अजित खनाल, प्राध्यापक सुमन भुसाल, सहायक प्राचार्य मोहन क्षेत्री, बालकृष्ण पोखरेल, बुद्धदिप मा.विका प्राचार्य लेखनाथ गैरे, दिवाकर रेग्मी, कार्यक्रम संयोजक सुन्दर गुरूङले पुरस्कृत वितरण गरे ।

कार्यक्रममा भर्चुअल माध्यमबाट मन्तव्य राख्दै प्राचार्य दिनेश भुसालले अक्सफोर्ड मा. वि विगतदेखि नै विद्यार्थीहरूको क्षमता प्रस्फुटनको लागि कार्य गरिरहेको बताए । एसईई दिएर बसेका विद्यार्थीहरूमा अन्तरनिहित प्रतिभा प्रस्फुटन हुने गरि कार्यक्रमहरु गर्दै आएको बताए ।

कार्यक्रममा प्राध्यापक सुमन भुसालले विद्यार्थीलाई कुनै पनि विषयमा व्यस्त गराई कुलतबाट टाढा राख्नुका साथै क्षमता पहिचान गर्नका लागि फुटसल, एमसिक्यु टेष्ट तथा अनलाइन खेलहरू समेत सम्पन्न गरेको बताए । कार्यक्रममा लोकेन्द्र शाहले अक्सफोर्डले विद्यार्थीको क्षमता प्रस्फुटन गर्नको लागि विभिन्न विद्यामा प्रतिस्पर्धा गराउनु सराहनीय काम गरेको बताउँदै अक्सफोर्डले शिक्षालाई मात्रै नभइ अन्य विद्यामा पनि उत्तिकै जोड दिदै आएको कारण नै चर्चा कमाउन सफल भएको बताए ।

प्रतियोगितामा विद्यार्थीहरूले नेपाली मौलिकता झल्काउने खालका गीतहरूमा आफ्नो नृत्य प्रस्तुत गरेका थिए । विभिन्न जिल्लाबाट एसईई दिएर बसेका विद्यार्थीहरूबिच भएको प्रतियोगितामा ३३ समूहको सहभागीता रहेको थियो । नृत्य निर्देशक संघ नेपालका अध्यक्ष सुमन थापा, नृत्य निर्देशक संघ कपिलवस्तु अध्यक्ष सुमन पौडेल प्रतियोगिताका निर्णायक रहेका थिए ।