खोज

बर्दघाट, १९ जेठ । बर्दघाट नगरपालिका वडा नम्बर ९ मा रहेको राजा महात्मा पूर्णभद्र माध्यमिक विद्यालयले जेहेन्दार र विपन्न विद्यार्थीको लागि अक्षय कोषको स्थापना गरेको छ । गत पुषमा विद्यालयले स्वर्ण महोत्सवको आयोजना गरेको थियो । स्वर्ण महोत्सवमा विभिन्न ब्यक्तिहरुबाट घोषित रकमबाट करिव १३ लाख रुपैयाको अक्षय कोष स्थापना गरिएको महोत्सव मुल आयोजक समितिका सँयोजक विक्रम खनालले जानकारी दिए ।

शनिबार आय ब्यय विवरण एवं प्रगती विवरण कार्यक्रमको आयोजना गरी महोत्सवमा भएको आम्दानी र खर्च विवरण प्रस्तुत गरिएको थियो ।
महोत्सव आयोजना गर्दा विभिन्न ब्यक्ति, सँस्था लगायत अन्य निकायहरुबाट कुल ५३ लाख ८१ हजार ४ सय ५० आम्दानी भएको थियो । यस्तै ३६ लाख ४५ हजार ३ सय ९ रुपैया महोत्सवमा खर्च भएको थियो भने विद्यालयले १७ लाख ३६ हजार १ सय ४१ रुपैया वचत गरेको थियो । गरिव तथा जेहेन्दार विद्यार्थीको लागि १३ लाख ४३ हजार १ सय ७२ रुपैयाको अक्षय कोष स्थापना गरिएको जानकारी गराइएको थियो ।

कार्यक्रमलाई बर्दघाट नगरपालिकाका नगर उप प्रमुख रुद्र प्रकाश उपाध्यायले सम्बोधन गर्दै गुणस्तरिय शिक्षामा जोड दिनुपर्ने बताएका थिए । विद्यार्थी सँख्या भन्दा पनि विद्यालयमा पढने विद्यार्थीको क्षमता विकासमा जोड दिनुपर्ने उनको भनाइ थियो । गुणस्तरिय शिक्षा प्रदान गर्न सक्षम भएमा स्वतः विद्यार्थीसँख्या वृद्धि हुने बताउँदै सँख्यात्मक भन्दा पनि गुणात्मक शिक्षा अहिलेको आवश्यकता रहेको उनको भनाइ थियो।
यस विद्यालयमा बर्दघाट नगरपालिका वडा नम्बर ८,९, १०, ११ र सरावल गाँउपालिकाको वडा नम्बर १ का विद्यार्थीहरुको सँख्या बढि रहेको र हाल ८ सय ५० विद्यार्थी अध्ययनरत रहेको विद्यालयका प्रधानाध्यापक पुष्पराज अधिकारीले जानकारी दिए ।