खोज

सल्यान, १८ जेठ । हरेकको घरमा खानेपानीको धारा छ, साथमा जुठेल्नो र टाँरको व्यवस्था छ । नजिकै रहेको करेसाबारीमा तरकारी खेती । सल्यानको कालिमाटी गाउँपालिका वडा नं. ५ मा विभिन्न पोषणयुक्त खाना, सुत्केरी महिलाको स्याहारसुसार, हजार दिनका आमा र बच्चाको हेरचाहका साथै सरसफाईका विविध गतिविधि नियमित सञ्चालन भइरहेका छन् । करिब दुई वर्ष अगाडि थालिएको अभियानबाट पोषणमैत्री स्थानीय शासन कार्यान्वयनका लागि विभिन्न सुचांक पुरा भएको कालिमाटी ५ का वडा अध्यक्ष टोप बहादुर कार्कीले जनाए । विगतमा अवस्था कमजोर रहेकोमा निरन्तर अभिमुखीकरण, सचेतना तथा सहयोग भएपछि पोषणमैत्री वडा घोषणाका लागि लगभग तयारी पुरा भएको उनको भनाइ छ । उक्त वडाका ५५८ घरधुरीमा घर गोठ अलग अलग, धुँवा रहित चुलो, घरआँगन र शौचालय सफाचट रहेका छन् ।

सुचकहरू पुरा गर्नका लागि । सम्बन्धीत वडा पालिकाबाट दिइने सेवा सुविधा रोक्का गरिएको । सुचकहरू पुरा गर्नका लागि आलटाल गर्ने घरपरिवारलाई वडा तथा गाउँपालिकाबाट प्रदान हुने सिफारिस तथा कुनै पनि सेवा सुविधाबाट वञ्चीत पनि गरिएको थियो । तर अहिले सबै घरधुरिले सुचक पुरा गरेपछि सरसफाई कार्ड प्राप्त गरेका छन् । खानेपानी योजना सञ्चालन, पाइप वितरण, विभिन्न समिति गठन, तालिम लगाएतका कार्यका लागि हालसम्म ५० लाख रूपैयाँ लगानी भइसकेको पनि वडा अध्यक्ष कार्कीले जनाए ।

पोषणमैत्री स्थानीय शासन कार्यान्वयन कार्यविधि २०८० अनुसार वडाले विभिन्न चरणहरू र ५० वटा सूचकहरू पुरा गरेपछिमात्रै पोषणमैत्री वडा घोषणा गर्न सकिन्छ । घोषणाका लागि भन्दै बुधबार जिल्लास्तरिय अनुगमन तथा मूल्यांकन समितिले वडा नं. ५ का विभिन्न गाउँमा स्थलगत अनुगमन गरेको छ । समितिका संयोजक तथा जिल्ला समन्वय समितिका प्रमुख बेलाराम रावल, सदस्यहरू दिपेन्द्र शाही, शंकर केसी, डिल्ली घर्ती, सदस्य सचिव निम बहादुर वली लगायतका सदस्यहरू तथा कालिमाटी गाउँपालिकाका अध्यक्ष दान बहादुर केसी, प्रमुख प्रशासकीय अधिकृत कृष्ण प्रसाद पौड्याल, वडा नं ५ का वडाध्यक्ष टोप बहादुर कार्की, स्वास्थ्य शाखा प्रमुख गोरख थापा, कार्यपालिका सदस्य सुमित्रा राना, सुचना प्रविधि अधिकृत विष्णु भण्डारी, सिअहेव हरिकला न्यौपाने लगायतको टोलीले स्थलगत अनुगमन गरेको हो ।
यस अभियानका लागि गाउँपालिका, वडा कार्यालय तथा विभिन्न विषयगत शाखाहरूले मिहेनतका साथ काम गरेको देखिएको भन्दै जिल्ला समन्वय समितिका प्रमुख रावलले स्थलगत अनुगमन गरिएको भन्दै तोकिएका सूचक पुरा भएनभएको बारे अध्ययन गरेर सूचक पुरा भएको भए घोषणाका लागि सिफारिस गरिने तथा बाँकी भएमा पृष्टपोषण सहितको प्रतिवेदन दिइने जनाए ।

गाउँपालिकाको तर्फबाट पोषणमैत्री वडा घोषणाका लागि लगभग सबै कार्य सम्पन्न गरिएको भन्दै कालिमाटी गाउँपालिकाका अध्यक्ष केसीले अन्य वडामा पनि क्रमिक रूपमा यो अभियान सञ्चालन गरिने जनाए । विभिन्न सूचकहरू पुरा भएकाले शिक्षा शाखा, न्यायिक समिति, कृषि तथा पशु विकास शाखा, विपद् व्यवस्थापन शाखा लगाएतका शाखाबाट प्रतिवेदन समेत प्राप्त भइसकेको र गाउँपालिकाका सबै शाखाले अभियानका लागि सक्रियताको साथ काम गरिरहेको कालिमाटी गाउँपालिकाका प्रमुख प्रशासकीय अधिकृत तथा पालिकास्तरिय निर्देशक समितिका सदस्य सचिव कृष्ण प्रसाद पौड्यालले जानकारी दिए ।