खोज

गुल्मी, १७ जेठ । गुल्मीमा उमेर पुगेपछि विवाह गर्ने जोडीलाई सम्मान गरिएको छ । जिल्लाको मदाने गाउँपालिका वडा नम्बर १ अन्तर्गत अग्लुङ्मा उमेर पुगेर विवाह गर्ने जोडीलाई सम्मान गरिएको वडाध्यक्ष सुशील चन्दले जानकारी दिए ।

शैक्षिक उत्प्रेरणा कार्यक्रम अन्तर्गत सामाजिक सचेतनाका लागि २० बर्ष उमेर पुरा गरी विवाह गर्ने नव जोडीलाई वडा कार्यालयले सम्मान गरेको हो । ‘विवाहवारी–२० वर्ष पारी’ भन्ने मुख्य उद्देश्यका साथ वालविवाह न्यूनीकरण गर्नका लागि वडा कार्यालयले उक्त कार्यक्रम गरेको वडाध्यक्ष चन्दले बताए ।

वडाले असल बुहारी तथा छोरीहरूलाई पनि सम्मान गरेको छ । बैदेशिक रोजगारीमा छोराहरू प्रदेश जाने तथा बुहारीहरू छोराछोरी पढाउने भन्दै सहर पस्ने चलन बढेको छ । बुहारीहरू शहर पसेसँगै गाउँमा बृद्ध बृद्धाहरू एक्लै हुन थालेका छन । सोही कारण बृद्ध बुबाआमाले दुख पाएको अबस्थामा सासुससुरा तथा बुबाआमासँगै रहेर पालनपोषण गरेका केही बुहारी तथा छोरीहरूलाई पनि वडाले सम्मान गरेको हो ।

शैक्षिक उत्प्रेरणा कार्यक्रम मार्फत १० जना असल बुहारीलाई पनि सम्मान गरिएको छ । वडाले उत्कृष्ट शिक्षक, उत्कृष्ट किसान, उत्कृष्ट विद्यार्थी, उत्कृष्ट कर्मचारी र उत्कृष्ट सामाजिक संघसंस्थाहरूलाई सम्मान गरिएको छ । विभिन्न बिधामा रहेर वडामा योगदान गर्नेहरूलाई दोसल्ला सम्मानपत्र सहित सम्मान गरिएको वडाध्यक्ष सुशील चन्दले जानकारी दिए । कार्यक्रममा एसइईमा उत्कृष्ट हुने विद्यार्थीलाई १० हजार, कक्षा ८ मा उत्कृष्ट हुनेलाई पाँच हजार तथा कक्षा ५ मा उत्कृष्ट हुने विद्यार्थीलाई ३ हजार नगद सहित सम्मान गरिएको थियो ।

मदाने गाउँपालिकाको वडा नम्बर १ मा गत निर्वाचनबाट युवा सुशील चन्द वडाध्यक्षमा निर्वाचित भएपछि वडामा यस्तै प्रकारका नमुना काम हुँदै आएका छन् । शैक्षिक तथा सामाजिक सचेतनाका लागि वडाबाट गरिएका यस्ता कार्यक्रमबाट समाजका आम नागरिकहरूमा थप उत्प्रेरणा जाग्ने बताईएको छ ।