खोज

नवलपुर, १६ जेठ ।

पुर्वी नवलपरासीको नवलपुरमा आलु खेति उत्पादन गरिने क्षेत्र रुपमा चिनिदै आएको छ र उत्पादन बर्सेनि बढ्दै पनि गएको छ । कृषि ज्ञान केन्द्र सँगै स्थानीय पालिकाले आलु खेती प्रवद्र्धन अन्तर्गत अनुदान कार्यक्रम सञ्चालन गर्न थालेपछि आलु खेतीतर्फ कृषकहरू आकर्षित भएका छन् ।

जिल्लामा यो आर्थिक वर्षमा तीन हजार दुई सय पाँच हेक्टर क्षेत्रफलमा आलु खेती भएको कृषि ज्ञान केन्द्र नवलपुरका सूचना अधिकारी विश्वास काफ्लेले बताए । यस वर्ष ५८ हजार चार सय १३ मेट्रिक टन आलु उत्पादन भएको छ ।

गत आर्थिक वर्ष तीन हजार एक सय ७५ हेक्टरमा आलु खेती भएकोमा यो वर्ष ३० हेक्टर जमिनमा थप विस्तार भएको काफ्लेको भनाइ छ । गत बर्ष जिल्लामा ५७ हजार तीन सय ५४ मेट्रिक टन आलु उत्पादन भएको थियो, गत वर्ष भन्दा यस वर्ष उत्पादन एक हजार ५९ मेट्रिक टनले बढेको काफ्लेले जानकारी दिए ।

जिल्लामा व्यावसायिक आलु खेती गर्ने किसानको संख्या प्रत्येक वर्ष बढेको कृषि ज्ञान केन्द्रको तथ्याङ्कमा देखिएको छ । पछिल्लो चार वर्षको आलु खेती गरिने क्षेत्रफल र उत्पादन हेर्दा प्रत्येक वर्ष वृद्धि हुँदै गएको देखिएको छ । जिल्लामा आर्थिक वर्ष २०७८÷७९ मा तीन हजार एक सय १५ हेक्टर क्षेत्रफलमा आलु खेती गरिदा ५० हजार एक सय ५२ मेट्रिक टन उत्पादन भएको थियो । आर्थिक वर्ष २०७७÷७८ मा तीन हजार एक सय १० हेक्टर क्षेत्रफलमा ५२ हजार नौ सय ९० मेट्रिक टन उत्पादन भएको थियो ।

जिल्लाको मध्यविन्दु, कावासोती नगरपालिका र हुप्सेकोट गाउँपालिका क्षेत्रमा आलु राम्रो उत्पादन हुने गरेको छ । सो क्षेत्रमा व्यावसायिक रूपमा आलु उत्पादन गर्ने कृषक र कृषि समूहको संख्या उल्लेख्य रहेको कृषि ज्ञान केन्द्र नवलपुरका प्रमुख कुलप्रसाद तिवारीले बताए । किसानले उत्पादन गरेको आलु स्थानीय बजारका साथै बुटवल, नारायणगढ र काठमाडौँ लगायतका बजारमा जाने गरेको छ ।