खोज

काठमाडौं,१३ जेठ । सहकारीको रकम ठगी र अपचलनविरुद्ध प्रमुख प्रतिपक्षी दल नेपाली कांग्रेसले आजबाट सडकमा पनि आन्दोलन सुरु गरेको छ।
सहकारी प्रकरणमा उपप्रधान एवं गृहमन्त्री रवि लामिछानेको समेत संलग्नता रहेको भन्दै संसदीय छानबिन समिति बनाउनुपर्ने माग राख्दै आएको कांग्रेसले आजबाट सडक आन्दोलन थालेको हो।
कांग्रेस भात्रृ संगठनहरूको उल्लेख्य सहभागिता रहेको आन्दोलनमा केन्द्रीय नेताहरूसमेत सडकमा उत्रिएका छन् । आन्दोलनका सहभागीहरुले सहकारी ठगीमा संसदीय छानवीन समिति गठन गर, सहकारी ठग कहां छन् ? गिरिबन्धु ठग जहां छन् लगायतका चर्का नाराबाजी गरेका थिए ।
महामन्त्री गगन थापा, विश्वप्रकाश शर्मा, प्रमुख सचेतक रमेश लेखक लगायतका सांसदहरू प्रदर्शनमा सहभागी हुन पुगेका छन्।
कांग्रेसले झण्डै २ महिनादेखि संसद् बैठक पनि अवरोध गर्दै आइरहेको छ। कांग्रेसले गृहमन्त्री लामिछानेमाथि छानबिन गर्न संसदीय छानबिन समिति गठन गर्नुपर्ने माग गर्दै आएको छ।
सत्तारुण दलहरु छानबिन समिति बनाउन तयार भए पनि गृहमन्त्री लामिछानेको नाम तोकेरै व्यक्तिकेन्द्रीत छानबिन समिति बनाउन नसकिने अडानमा छन्।

कांग्रेसले भने गृहमन्त्रीको नाम उल्लेख गरेर छानबिन समितिको कार्यादेश बनाउनु पर्ने बताउँदै आएको छ। जसका कारण सहमति जुट्न सकेको छैन।संसद् खुलाउने पहल भइरहँदा सहमति जुट्न नसकेपछि कांग्रेसले आन्दोलन घोषणा गरेको थियो।
गत बुधबार बसेको केन्द्रीय समिति र संसदीय दलको संयुक्त बैठकले काठमाडौँ, भक्तपुर र ललितपुर कार्यसमितिको ब्यानरमा सहकारी पीडितको पक्षमा प्रदर्शन गर्ने निर्णय गरेको थियो।
जसका लागि १५ जना कमाण्डरहरूसमेत तोकिएको थियो।