खोज

सुनवल, ९ जेठ ।

पश्चिम नवलपरासीको रामग्राम नगरपालिकाले वुद्ध जयन्तीको अवसरमा धातु जात्रा निकाल्ने भएको छ । गत वर्ष जस्तै यस वर्ष पनि नगरपालिकाले वुद्धको मावली दाबी गरिएको स्थल रामग्राम १८ पण्डितपुरदेखि वुद्धको एक मात्र सिंगो अस्थी धातु सुरक्षित रहेको स्थल रामग्राम स्तुपसम्म धातुजात्रा गर्न लागेको हो ।

पण्डितपुरबाट भोली (विहिवार) बिहान ७ बजे हात्तीबाट सुरु हुने धातु जात्रा विभिन्न स्थान परिक्रमा गरी ५ घण्टापछि रामग्राम स्तुपमा पुग्ने नगर प्रमुख धनपत यादवले आयोजित पत्रकार सम्मेलनमा जानकारी दिए । श्रीलङ्काबाट ल्याईएको वुद्धको अस्थीधातुलाई हात्तीमा राखेर परिक्रमा गर्ने र आम सर्वसाधारणले समेत दर्शन गर्न पाउने व्यवस्था गरिने नगर प्रमुख यादवले बताए । रामग्राम स्तुप र पण्डितपुरको विकास र प्रवद्र्धनका लागि गत वर्षदेखि वुद्ध जयन्तीको अवसरमा सुरु भएको धातु जात्रालाई यस वर्ष पनि निरन्तरता दिदै सप्ताहव्यापी कार्यक्रम आयोजना गरिएको यादवको भनाई छ ।

यादवले लुम्बिनी विकास कोषले रामग्राम सहितका अन्य वुद्ध स्थलको विकासमा चासो नदिएको गुनासो गरे । कोषका पदाधिकारीहरुलाई पटक पटक यस विषयमा ध्यानााकर्षण गराएको पनि उनले बताए । लुम्बिनीमा मात्र नभई कोषले रामग्राम स्तुपलगायतका क्षेत्रमा पनि वुद्ध जयन्ती भव्यताका साथ मनाउनुपर्ने भएपनि कोषले चासो नदिएका कारण नगरपालिकाले गत वर्षदेखि धातु जात्रासहितको कार्यक्रम आयोजना गरेको बताए । गत वर्ष प्रधानमन्त्री पुष्पकमल दाहाल प्रचण्डको उपस्थितिमा रामग्राम स्तुपमा अस्थीधातु सहितको कार्यक्रम भएको थियो ।

सो क्रममा उपप्रमुख सम्झना चौधरीले सप्ताहव्यापी रुपमा आयोजना गरिएको खेलकुदका कार्यक्रममा युवाहरुमा उत्साह थपेको बताईन् । वुद्ध जयन्तीको अवसरमा नगरपालिकाले सप्ताहव्यापी खेलकुदको कार्यक्रम आयोजना गरेको छ ।
सो कार्यक्रमको बिजेतालाई बिहीबार रामग्राम स्तुपमा आयोजना हुने समापन समारोहमा पुरस्कार वितरण गरिने छ । नगरपालिकाले वुद्ध जयन्तीको अवसरमा भलिबल, फुटवल, तेक्वान्दो, व्याड्मिन्टन, क्रिकेट लगायतका खेलकुद प्रतियोगिता र वक्तृत्वकला प्रतियोगिताको आयोजना गरेको थियो ।

रामग्राम नगरपालिकाका प्रमुख प्रशासकीय अधिकृत मोहन अर्यालले आम सर्वसाधारणले समेत वुद्धको अस्थीधातुको दर्शन गर्न पाउनु गर्वको विषय भएको उल्लेख गरे । नगरपालिकाले गत शुक्रबार पण्डितपुरमा एक कार्यक्रमको आयोजना गरी वुद्ध जयन्तीको सप्ताहव्यापी कार्यक्रमको शुभारम्भ गरेको थियो ।