खोज

काठमाण्डौ ।

समस्याग्रस्त सहकारीका सञ्चालकहरूले सर्वसाधारणको बचत घरजग्गा खरिदमा लगानी गरेको सहकारी सुधार सुझाव कार्यदलले सरकारलाई बुझाएको प्रतिवेदनमा उल्लेख छ।

सरकारले गठन गरेको समस्याग्रस्त सहकारी व्यवस्थापन समितिको कार्यालयले सङ्कटग्रस्त घोषणा भएका २० वटा सहकारी संस्थाको चल अचल सम्पत्ति र सञ्चालकहरूको निजी सम्पत्ति लिलामी गरेर बचतकर्ताहरूको पैसा फिर्ताको जिम्मेवारी पाएको छ। तर सहकारी संस्थाका सञ्चालकहरूले त्यस्तो सम्पत्ति बैकंमा धितो राखेर ऋण लिएको पाइएका कारण लिलामी प्रक्रियामा समस्या भएको समितिका सदस्यसचिव केशवप्रसाद पौडेलले बताए।

पौडेलका अनुसार कतिपय सहकारी संस्थाहरूको अचल सम्पत्ति लिलामका लागि सूचना निकाल्दा समेत कसैले लिलाम स्विकारेको छैन।

उनले बचतकर्ताबाट किनेको सम्पत्तिमा बचतकर्ताहरूको अग्राधिकार हुनुपर्ने बताए। तर बचतकर्ताहरूको सम्पत्तिबाट सहकारी सञ्चालकहरूले खरिद गरेको सम्पत्तिबाट धितो लिलामी प्रक्रियामा लैजान बैकंहरूले आफूहरूसँग समन्वय नगरेको समितिको आरोप छ।

कुनै पनि संस्थाबाट रोकिएका सम्पत्तिको चलनचल्तीको मूल्य कायम गरेर बाँकी रहेको रकम बचतकर्तालाई फिर्ता गर्नुपर्ने सहकारी ऐनको व्यवस्थामा रहेको पौडेलको भनाइ छ ।

लिलामी प्रक्रियामा बैकंहरु र समितिबीच समन्वय हुन सके करिब ७० प्रतिशत सहकारीहरूको समस्या समाधान हुने अधिकारीहरूको दाबी छ।