खोज

बुटवल, ७ जेठ ।

बुटवल उपमहानगरपालिका वडा नं. ७ को आयोजना र सिद्धेश्वर लालकुमारी माविको समन्वयमा तीन दिने उद्घोषण तालिम सम्पन्न भएको छ ।

विद्यार्थीहरुको क्षमता र व्यक्तित्व विकासमा टेवा पुर्याउने उद्देश्यले सिद्धेश्वर लालकुमारी माविमा तालिम सञ्चालन गरिएको हो । तालिममा सहभागी विद्यार्थीहरुले तालिम पश्चात आफूहरुले आत्मविश्वासका साथै माईक समाएर निर्धक्क भएर बोल्न सक्ने, असल उद्घोषक बन्नका लागि गर्नुपर्ने कुरा र कसरी कार्यक्रम सञ्चालन गरिन्छ भन्ने कुराबारे थाहा भएको बताए ।

तालिमको समापन कार्यक्रममा बोल्दै बुटवल उपमहानगरपालिका वडा नं. ७ का अध्यक्ष पदम गाहाले ३ दिनसम्म तालिममा सहभागी भएर सम्पन्न गरेकोमा विद्यार्थीहरुलाई शुभकामना दिँदै तालिममा सिकेका कुराहरुलाई विद्यार्थीहरुले व्यवहारमा ल्याउनुपर्ने बताए ।

उनले विद्यार्थीहरुको क्षमता विकासमा मध्यनजर गर्दै आगामी दिनमा पनि विद्यार्थीहरुको नेतृत्व विकास र माईन्युट लेखन तालिमको आयोजना गर्ने प्रतिवद्धता जनाए । उनले नेतृत्व विकासको तालिमले विद्यार्थीहरुलाई सक्षम बनाउने भएकाले यस खालको तालिम विद्यालय स्तरमा प्रदान गर्ने लक्ष्यका साथ बुटवल उपमहानगरपालिका वडा नं ७ निरन्तर सक्रिय रुपमा लागिरहेको बताए ।

३ दिनसम्म सन्चालन भएको उद्घोषण तालिम विद्यालय र विद्यार्थीका लागि निकै प्रभावकारी र उपलब्धिमूलक रहेको सिद्धेश्वर लालकुमारी माविका प्राचार्य दिनानाथ गिरीले बताए । ३ दिनको तालिम पश्चात विद्यार्थीहरुमा बोल्न सक्ने कलामा परिवर्तन भएको देखेपछि आफू निकै खुशी भएको बताउँदै प्रशिक्षकहरुलाई उनले धन्यवाद ब्यक्त गरे । आगामी दिनमा विद्यार्थीहरुलाई क्षमता अभिवृद्धि बढाउन अन्य तालिमको समेत समन्वय गर्ने उनले बताए । विद्यार्थीहरुमा लुकेर रहेको प्रतिभा उजागर गर्न यस खालको तालिमले महत्वपूर्ण भूमिका खेल्ने उनको भनाई थियो । विद्यार्थीहरुको मनोभावना बुझेर उनीहरुको क्षमता विकासमा मध्यनजर गर्दै आफू निरन्तर लागिरहेको बताए । उनले वडा नं. ७ बाट प्राप्त सहयोगबाट विद्यालयमा अध्ययनरत विद्यार्थीहरुलाई विभिन्न तालिम तथा अन्य शैक्षिक गतिविधि गर्न सहज भएको बताए ।

३ दिनको उद्घोषण तालिम पश्चात विद्यार्थीहरुमा प्रत्यक्ष रुपमा सकारात्मक परिवर्तन पाएको सिद्धेश्वर लालकुमारी मावि विद्यालय व्यवस्थापन समितिका अध्यक्ष सागर प्रसाद न्यौपानेले बताए । उनले विद्यार्थीहरुलाई तालिमबाट सिकेका कुराहरु निरन्तर अभ्यासमा ल्याउन सुझाव दिए । उनले वडा नं ७ को सहयोगमा विद्यार्थीहरुको क्षमता र व्यक्तित्व विकास गर्न तालिमको आयोजना गरिएको जानकारी दिए । उनले विद्यार्थीहरुका लागि यो तालिम अत्यन्तै उपयोगी भएको बताए । उनले विद्यार्थीहरुको क्षमता विकासका लागि विद्यालयस्तरका विद्यार्थीहरुलाई यस खालको तालिम दिनुपर्ने आवश्यक रहेको बताए ।

३ दिन सम्म सन्चालन तालिममा प्रशिक्षक पत्रकार सुजिता श्रेष्ठसँगै कुमारी थापा र मनु गरुङ्गले सहजीकरण गरेका थिए । यही जेठ २ गतेदेखि ४ गतेसम्म सिद्धेश्वर लालकुमारी माविको हलमा भएको उद्घोषण तालिममा ४० जना विद्यार्थीहरुले सहभागिता जनाएका थिए । तालिममा अन्य निजी विद्यालय त्रिभुवन युनाइटेड एकेडेमी र साईनिङ्ग ईङ्लिस बोर्डिङ्ग स्कुलको पनि सहभागिता रहेको थियो । तालिममा सहभागी सम्पूर्ण विद्यार्थीहरुलाई वडा नं ७ का वडा अध्यक्ष पदम गाहाले प्रमाण पत्र वितरण गरेका थिए ।