खोज

सुर्खेत, ३ जेठ ।

एमालेभित्र देखिएको आन्तरिक विवादका कारण कर्णाली प्रदेशका मुख्यमन्त्री यमलाल कँडेलले दुई वटा मन्त्रालयको जिम्मेवारी पनि आफैसँग राखेका छन् । यसअघि आन्तरिक मामिला तथा कानुन मन्त्रालय आफूसँग राखेका उनले अहिले भने भूमि व्यवस्था, कृषि तथा सहकारी मन्त्रालय पनि आफैसँग राखेका हुन् ।

कृषिमन्त्रीमा सिफारिस गरिएका विनोदकुमार शाहले शपथ ग्रहण गर्न अस्वीकार गरेपछि उक्त मन्त्रालय कँडेलले आफैसँग राखेका छन् । मुख्यमन्त्री कँडेलले शाहलाई १८ बैशाखमा कृषिमन्त्रीमा नियुक्त गरेका थिए । तर, हालसम्म पनि शाह मन्त्रालय आउने कुनै छाँटकाँट नदेखेपछि कँडेलले उक्त मन्त्रालय पनि आफैसँग राखेका हुन् ।

संविधानको धारा १६८ को उपधारा (९) अनुसार प्रदेश प्रमुख तिलक परियारले मन्त्रीपरिषद्को जिम्मेवार हेरफेर गरेका छन् । जसअनुसार मुख्यमन्त्री कँडेलले मुख्यमन्त्री तथा मन्त्रीपरिषद्को कार्यालयसँगै आन्तरिक मामिला तथा कानुन मन्त्रालय र भूमि व्यवस्था, कृषि तथा सहकारी मन्त्रालयको जिम्मेवारी समेत सम्हाल्ने छन् । त्यसबाहेक अन्य मन्त्री र मन्त्रालय भने यथावत छन् ।

पूर्वमन्त्री समेत रहेका एमाले प्रदेशसभा सदस्य शाहले आफुले चाहेको मन्त्रालय नपाएपछि शपथग्रहण अस्विकार गरेका थिए । शाहले भौतिक पूर्वाधार तथा सहरी विकास मन्त्रालय मागेका थिए । तर मुख्यमन्त्री कँडेलले शाहलाई कृषिमन्त्रीमा नियुक्त गरे । मुख्यमन्त्री कँडेलले भौतिक तथा पूर्वाधार मन्त्रालयमा शेरबहादुर बुढालाई सिफारिस गरेका छन् ।

मन्त्रीको शपथ लिन तयार हुँदासम्म पनि कुन मन्त्रालयको जिम्मेवारी दिने भन्ने विषयमा एमालेका सांसदहरुलाई जानकारी गराइएको थिएन । एमालेबाट विनोदकुमार शाह, शेरबहादुर बुढा र राज्यमन्त्री गमता विकलाई शपथग्रहण गर्न आउन मुख्यमन्त्री कँडेलले भनेका थिए । सोही बमोजिम नेताहरू मन्त्रीको शपथ लिने तयारी गरिरहेका थिए । जसमा भौतिक पूर्वाधार तथा शहरी विकास मन्त्रीको शपथ लिने तयारी शाहले गरिरहेका थिए ।

सुरुमा गोप्य राखिएको मन्त्रीहरूको नामावली प्रदेश प्रमुखको कार्यालयले सार्वजनिक ग¥यो । उक्त नामावलीमा भौतिकमन्त्रीको शपथ लिने तयारी गरेका शाहको नाम भूमि व्यवस्था, कृषि तथा सहकारी मन्त्रीमा थियो । यसबाट रुष्ट बनेका उनले शथप ग्रहण कार्यक्रम नै बहिष्कार गरे ।

शपथ ग्रहणलाई बहिस्कार गरेका उनी पार्टीमा वरिष्ठताका आधारमा आफूलाई अपमान गरिएको प्रतिक्रिया दिएका थिए । शपथ बहिस्कार पश्चात शाह काठमाडौं पुगेर एमाले अध्यक्ष केपी शर्मा वली र प्रधानमन्त्री पुष्पकमल दाहाल प्रचण्डलाई भेटेका छन् ।

हाल कर्णाली सरकारमा मुख्यमन्त्री सहित एमालेबाट दुई मन्त्री र एक राज्यमन्त्री छन् भने अर्को सत्तासाझेदार दल नेकपा (माओवादी केन्द्र) बाट चार मन्त्री छन् ।