खोज

लमही, ३ जेठ ।

लुम्विनी प्रदेशमै अत्याधुनिक भिडियो एक्सरे (युएसजी) मेसिन राप्ती स्वास्थ्य विज्ञान प्रतिष्ठानमा जडान गरिएको छ । लुम्विनी प्रदेशको स्वास्थ्य मन्त्रालयले अत्याधुनिक सुविधायुक्त भिडियो एक्सरे मेसिन प्रतिष्ठानलाई हस्तान्तरण गरेको हो ।

विहीवार एक कार्यक्रमका विच प्रदेशका स्वास्थ्यमन्त्री दिपेन्द्र पुनले प्रतिष्ठानका उपकुलपति डा. विकास लामिछाने, रजिष्ट्रार प्राध्यापक श्याम लम्साललाई मेसिन हस्तान्तरण गरेका हुन् । मन्त्री पुनले नै मेसिनको रिवन काटेर उद्घाटन गरेका हुन् ।

मन्त्री पुनले अस्पतालको ओपिडी, इमरजेन्सी, सर्जरी लगायत विभिन्न विभागहरुको समेत स्थलगत अवलोकन गरेका छन् । अवलोकनपछि प्रतिष्ठानमा आयोजित कार्यक्रममा वोल्दै मन्त्री पुनले प्रदेश सरकारको तर्फवाट सुविधा सम्पन्न भिडियो एक्सरे प्रतिष्ठानलाई प्रदान गरेको भन्दै अस्पतालको सेवालाई चुस्तदुरुस्त र विरामीमैत्री बनाउन आग्रह गरे । प्रतिष्ठान प्रदेशकै गौरवको आयोजना भएको भन्दै उनले पश्चिम नेपालको स्वास्थ्य क्षेत्रमा दाङलाई हव बनाउन सबैले सहयोग गर्नुपर्ने बताए ।

यो प्रदेशमा सरकारी मेडिकल कलेजका रुपमा प्रतिष्ठान रहेकाले यसको विकासका लागि प्रदेश सरकारले सबैखाले सहयोग गर्ने प्रतिवद्धता गरे । उनले प्रतिष्ठानले एमडी पढाई सुुरु गरिसकेको र एमविविएसको पढाई पनि सुरु गर्ने गरी आफ्नो तर्फवाट तयारी तीव्र पारेकाले यसमा पनि प्रदेश सरकारले ल्याव बनाउनेदेखि पूर्वाधारमा केन्द्र सरकारसंग पनि समन्वय गर्ने कुरामा आस्वस्त पारे ।

त्यस्तै मन्त्री पुनले एमविविएसको आवश्यक तयारीको लागि जिल्ला जनस्वास्थ्य कार्यालयको भवनलाई प्रयोगमा ल्याउन मन्त्रीस्तरीय निर्णय पनि गरिएको जानकारी दिए । जनस्वास्थ्य र प्रतिष्ठानको आपसी समझदारीमा भवनको प्रयोग गर्ने गरी ब्यवस्था मिलाइएको उल्लेख गर्दै उनले अन्यत्र स्थानमा जनस्वास्थ्यको भवन बनाउन आवश्यक बजेट विनियोजन गरिने र भवन निर्माण भएपछि आफ्नो कार्यालयमा जनस्वास्थ्य सरेपछि प्रतिष्ठानले सबै भवन प्रयोग गर्ने बताए । फिलिप्स कम्पनीको नयाँ भिडियो एक्सरे मेसिनवाट फोरडी इमेज, कलेजो स्पष्टसहित देखिने र वच्चाहरुको विभिन्न अंगहरु पनि सजिलै देख्न सकिने प्रतिष्ठानका सूचना अधिकारी निशानदाजु भट्टराइले बताए ।

प्रतिष्ठानमा नयाँ भिडियो एक्सरे थपिएसँगै यसको संख्या २ पुगेको छ । भिडियो एक्सरे गर्ने रेडियोलोजिष्ट चिकित्सकहरुको संख्या ३ पुगेको छ । सो अवसरमा प्रतिष्ठानका कामु निर्देशक डा. रमेश कंडेलले प्रतिष्ठानको विस्तारित सेवाको वारेमा जानकारी गराएका थिए । प्रतिष्ठानमा सिटि स्क्यान, आइसियु, एमआरआई, एनआइसियु, पिआइसियु जस्ता महत्वपूर्ण सेवाहरुसंगै चिकित्सकहरु पनि थपिदै गएकाले अव सामान्य उपचारका लागि जिल्ला वाहिर यस क्षेत्रका जनताहरु जाग्नु पर्ने बताए । प्रतिष्ठाका रजिष्ट्रार प्राध्यापक श्याम लम्सालले प्रतिष्ठानको सेवालाई मजवुत बनाउदै शैक्षिक कार्यक्रमलाई पनि अघि बढाइ रहेको बताए । उनले विएनएस र विएसस्सी नर्सिङ, डाक्टरको स्नाकोत्तर तह (एमडी) को पढाई सुरु गरेर शैक्षिक कार्यक्रमको सुरुवात गरिएको चर्चा गर्दै आवश्यक बजेट प्रतिष्ठानले पाएमा एमविविएसको पढाई सुरु गर्ने बताए ।