खोज

पाल्पा, २ जेठ । पिताम्बर बस्यालका तीनवटा छोरा सबैले तानसेनको निजी शिक्षण संस्थामा माध्यमिक तहमा अध्ययन गर्दछन् । यस बर्ष उनलाई निजी बिद्यालयमा पठन पाठन गराएकोमा पश्चाताप भएको छ ।
सरकारी बिद्यालयको तुलनामा निजी बिद्यालयमा प्रत्येक बर्ष पाठ्यपुस्तक परिवर्तन भएका कारण उनलाई यस्तो भएको हो । यस बर्ष नयाँ शैक्षिक सत्रको सुरुवात भएसंगै तीन पटक पाठ्यपुस्तक परिवर्तन भएको छ । उनले भने ।
पिताम्बर बस्याल जस्ता निजी बिद्यालयका संयौ अभिभावकहरुलाई पाठ्यपुस्तक परिवर्तन हुनु स्वभाबिक भएपनि शैक्षिक सत्र सुरु भएको महिना दिन पूरा भएपछि कक्षा ८ देखि १० सम्मको ऐच्छिक गणित बिषयको प्रकाशन गृह परिवर्तन हुँदा अभिभावकहरु अन्योलमा परेका हुन् ।
निजी बिद्यालयहरुको छाता संगठन प्याब्सनले प्रकाशन गृहबाट पाठ्यपुस्तक लागु गराए बापत पाउने कमिसनको खेलमा लागेका कारण बिद्यार्थी, अभिभावकले सास्ती खेप्नु परेको अभिभावकहरुको गुनासो छ ।
कक्षा १० मा अध्ययनरत कृतिका भट्टराई भन्दछिन पहिले ओसन प्रकाशनको ऐच्छिक गणित लागु भएको कारण पसलबाट खरिद गरेको तर एक महिना पछि रिडमोर प्रकाशनको ऐच्छिक गणित लागु गर्ने भनियो, नयाँ प्रकाशनको यो बिषय पनि बजारमा आजसम्म पाइएको छैन । प्याब्सनले बिद्यार्थीको अनुकुलता भन्दा संगठनको अनुकुलताको लागी निर्णय गर्दा बिद्यार्थीमा अन्योलता उत्पन्न भएको छ । उनले भनिन् ।
प्याब्सनले नयाँ शैक्षिक सत्रको सुरुवात हुनु अगाडी कक्षा १ देखि १० सम्मको बिज्ञान बिषय, कक्षा १ देखि ५ सम्मको अंग्रेजी, कक्षा १ देखि ७ सम्मको नेपाली, कक्षा ४ देखि ७ सम्मको नेपाली ब्याकरण र कक्षा ६ देखि १० सम्मको अनिवार्य गणित बिषयको प्रकाशन गृह परिवर्तन गरेको थियो । त्यस्तै बैशाखको मध्य तिर कक्षा १ देखि ३ सम्म पढाई हुने सेरोफेरो बिषय प्याब्सनले परिवर्तन गर्यो । भने बैशाखको अन्त्यमा ऐच्छिक गणित परिवर्तन गरेको हो । नयाँ शैक्षिक सत्र सुरु भएको महिना दिन बित्न नपाउदै पठनपाठन हुने पुस्तकको प्रकाशन परिवर्तन हुदाँ अध्ययन गराउने र अध्ययन गर्ने दुबैलाई अन्योल भएको बिषयगत शिक्षकहरु बताउछन् ।
प्याब्सन पाल्पाका अध्यक्ष महेशमान बज्राचार्य भन्दछन् पाठ्यपुस्तक परिवर्तन भएको होइन प्रकाशन गृह परिर्वतन भएको हो । यो रहरले भन्दा बाध्यताका कारण भएको हो । यस बर्ष ऐच्छिक गणित प्रकाशन गृहका कारणले गर्दा परिवर्तन गर्नु परेको हो । उनले भने ।
प्रकाशन गृहबाट उपलब्ध हुने कमिसनको खेलका कारण प्याब्सनले प्रत्येक बर्ष पुस्तक परिवर्तन गर्दछ । सामुदायिक बिद्यालयहरुमा खासै पुस्तक परिवर्तन नहुने तर निजी बिद्यालयमा परिवर्तन भईरहने कमिसनको खेल बाहेक के हुन्छ र ? अभिभावक भरत थापा बताउछन् । पुस्तक ब्यबसायी समेत प्याब्सनको क्रियाकलाप प्रति असन्तोष भएका छन् । ब्यबसायी भन्दछन् एक महिना अगाडी बिक्रि गरेको पुस्तक फिर्ता गर्नु पर्यो । त्यो ब्यबसायका लागी नोक्सान हो ।
जिल्ला भरि निजी बिद्यालयमा ऐच्छिक गणित बिषय अध्ययन गर्ने बिद्यार्थीको संख्या आठ सय भन्दा बढी रहेको छ । शिक्षा समन्वय ईकाइा प्रमुख महेन्द्र सुबेदीका अनुसार जिल्ला भित्र ४९ वटा निजी बिद्यालयहरु रहेका मध्य माबि तहका १९ वटा बिद्यालयहरु रहेका छन् । प्याब्सनले पटक पटक पुस्तक परिवर्तन गरे पनि सबै पुस्तक हालसम्म पनि सजिलै उपलब्ध छैनन् ।
प्रकाशन गृहबाट पुस्तक लागु गरिदिए बापत कमिसनको खेल हुने भएका कारण बिगत देखिनै यस्तो नियति बिद्यार्थी तथा अभिभावकले बेहोर्दै आएका छन् ।