खोज

बुटवल, १ जेठ । राष्ट्रिय युवा संघ नेपालको ३५ औ स्थापना दिवस रुपन्देही जिल्ला कमिटीले विविध रचनात्मक कार्य गर्दै मनाएको छ । युवालाई संगठित गरि राजनीतिक र नेतृत्व विकाससंग सामाजिक गतिविधिमा अग्रसर गराउदै आएको संघले आफनो स्थापना दिवसलाई सप्ताहब्यापी रुपमा रचनात्मक कार्य गरि मनाएको हो ।

जिल्लाभरि नै विभिन्न पालिकाहरुमा डष्टबिन वितरण, सातु र सर्वत वितरण, खेलकुद तथा शैक्षिक सामग्री वितरण, जेब्राक्रस रेखाकङ, रक्तदान, सरसफाई तथा जनचेतनामुलक कार्यक्रमहरु समेत गरिएको जिल्ला कमिटिका अध्यक्ष विकासजंग बस्नेतले बताए । ‘हामीले मर्चवार, ओमसतिया, सियारी, सैनामैना, सिद्धार्थनगर, देवदह लगायतका पालिकाहरुमा रचनात्मक कार्यहरु गरेका छौ ।’—उनले भने । राष्ट्रिय युवा संघ नेपाल, रुपन्देही शाखाले मुख्य कार्यक्रम अन्तरगत सोमबार गौतम बुद्ध सामुदायिक मुटु अस्पतालमा फलफुल वितरण गरेको उनले बताए ।

कार्यक्रमको लुम्बिनी प्रदेशका पुर्व मुख्यमन्त्री लिला गिरिले अस्पतालमा उपचारमा रहेका बिरामीहरुलाई फलफुल वितरण गर्दै नेकपा एमाले पार्टीको महत्वपूर्ण जनसंगठनका रुपमा संघको भुमिका रहेको बताए । स्थापनाकालमा प्रजातान्त्रिक युवा संगठन हुदै पारिमार्जित भएर राष्ट्रिय युवा संगठन नेपाल भएको उनले बताए । विभिन्न जनसंगठनमध्येको यो एक शसक्त भएको बताए ।

यसैगरि मंगलबार सैनामैना नगरपालिकाका विभिन्न विद्यालयका ४ दर्जन गरिब तथा जेहेन्दार विद्यार्थीहरुलाई विद्यालय झोला वितरण, खेलकुद तथा शैक्षिक सामग्री वितरण गरिने स्थापना दिवस समारोह समिति रुपन्देहीका संयोजक तथा जिल्ला कोषाध्यक्ष नारायण प्रसाद थापाले बताए ।

भिडियो सामग्री