खोज

बुटवल, २६ बैशाख । रुपन्देहीमा जारी जेट नेपाल यु—१४ टिट्वान्टी क्रिकेट च्याम्पियनसिपमा न्यु होराइृजन बोर्डिङ स्कुल र बुद्ध पब्लिक स्कुल फाईनलमा स्थान बनाएको छ । बुटवल उपमहानगरपालिकाको सहयोग तथा वेष्ट्रन क्रिकेट क्लबको आयोजनामा बुधबार भएको पहिलो सेमीफाईनलमा न्यु होराईजन स्कुलले स्टार क्रिकेट एकेडेमीलाई ५७ रन तथा बुद्ध पब्लिक स्कुलले आयोजक वेष्ट्रन क्रिकेट क्लबलाई सुपर ओभरमा पराजित गर्दै उपाधि दाबेदारी पेश गरेका छन । प्रतियोगिताको फाईनल खेल विहिबार हुने आयोजक क्लबका अध्यक्ष भुवन पाण्डेले बताए ।

नहरपुर माविस्थित खेलमैदानमा भएको खेलमा टस जितेर न्यु होराईजनले २० ओभरमा ६ बिकेटको नोक्सानीमा १८९ रनको बिशाल लक्ष्य खडा गरेको थियो । न्यु होराईजनका सफल भट्टराईले ४६ बलमा ११ चौकाको मद्यतले शानदान ५७ रनको अर्धशतकिय पारी खेलेका थिए ।
अरुण कुमार नाउले १५ बलमा ३१ रन तथा निरज घिमिरेले १६ बलमा २८ रनको योगदान दिए । स्टारका राहुल क्षेत्रीले ३ तथा दिपेन्द्र रेग्मीले २ बिकेट लिए । विशाल लक्ष्य पछ्याएको स्टारको ओपनरहरु क्रिजमा जम्न नसक्दा खेलमा हार ब्यहोरेको थियो । मध्यम क्रममा आएका अमोध बश्यालले ३० बलमा ४४ तथा राहुल क्षेत्रीले २५ बलमा ४० रन जोडेपनि अन्य ब्याट्सम्यानहरु भने दोहोरो अंक जोड्न सकेनन । १९ ओभरमा केवल १२५ रनमा स्टारका खेलाडीहरु समेटिए । कम स्कोरमा रोक्न न्यु होराईजनका अमृत अर्यालले ३ तथा कृष्ण पन्थी र अरण कुमार नाउले २—२ बिकेट लिए । खेलमा न्यु होराईजनका सफल भट्टराई प्लेयर अफ दी म्याचबाट पुरस्कृत भए ।

यसैगरी दोस्रो खेलमा वेष्ट्रनले ब्याटिङ रोजेर निर्धारित २० ओभरमा ८ बिकेट गुमाएर १३० रनको लक्ष्य खडा गरेको थियो । वेष्ट्रनका निश्चल पौडेलले ३१ बलमा २२ तथा केशव रायमाझीले ३५ बलमा ३० रनको बनाए । मध्यम लक्ष्य पछ्याएको बुद्ध पब्लिकका ब्याट्सम्यानहरुले निर्धारित २० ओभरमा ६ बिकेट गुमाएर समान १३० रन नै जोडेको थियो । बुद्धका बिनय कार्कीले ५९ बलमा ६३ रनका साथ शानदार अर्धशतक पुरा गरे । खेल सुपर ओभरमा धकेलियो । सुपर ओभरमा बुद्ध पब्लिक विजयी भयो । वेष्ट्रनका जागृत पोखरेलले २ बिकेट लिए । खेलमा बुद्ध पब्लिकका बिनय कार्की प्लेयर अफ दी म्याचबाट पुरस्कृत भए ।

प्रतियोगितामा रुपन्देही जिल्लाका विभिन्न क्लबका ८ टिमलाई दुई पोलमा राखेर खेलाईएको थियो । प्रतियोगिताको उपाधि विजेताले नगद २१ हजार रुपैया, ट्रफी, मेडल, प्रमाणपत्र तथा उपविजेता टिमले नगद ११ हजार रुपैया, ट्रफी, मेडल, प्रमाणपत्र तथा उत्कृष्ट खेलाडीहरुलाई समेत विधागत रुपमा नगद तथा मेडल प्रमाणपत्रबाट पुरस्कृत गरिने छ ।