खोज

लमही, २० बैशाख । राजपुर गाउँपालिकाको वडा नम्बर ७ स्थित हाडवास गाउँमा गत बैशाख १६ गते दिउँसो भएको भिषण आगलागिबाट पीडित परिवार खुल्ला आकाश मुनि बस्न बाध्य छन् । आगालागीबाट २३ घर र गोठ समेत जलेर खरानी भएका थिए । पीडितहरू त्रिपाल र खुल्ला आकाश मुनिको बास बस्न बाध्य रहेका छन् । खानेपानीको पाईप जलेपछि पीडितहरूलाई खानेपानीको समस्या समेत भएको छ । हावाहुरीको समयमा खुल्ला आकाश र त्रिपालमुनिको वासले निकै कठिनाई ब्यहोर्नु परेको पीडितहरूको गुनासो छ ।

बस्ने वास छैन, खाने गास छैन न पिउने पानी नै छ कन्तबिजोग ब्यहोरेर दिन काटेका छौं, सरकार हामीलाई आवास बनाईदिनु पर्यो–स्थानीय अग्निपिडीत टेकबहादुर डाँगीले भने । आगोले घरमा भएका लत्ता कपडा, खाद्यान्न,काठपात, कागजपत्र, पैसा र गरगहना सबै खाइदियो । बर्षभरी खाने राशन जल्यो, बस्ने घर सम्म बनाउन पाए त मजदुरी गरेरै भएपनि ज्यान पाल्ने थियौं । हामीलाई बस्ने बास छिट्टै चाहियो सरकार समक्ष कुरा पर्याईदिनु पर्यो–अग्निपिडित टुकनाथ योगिले भने । घर सबै जलेर खरानी भयो, गाउँ नै आगोले बिस्थापित गरायो । हामीलाई आवासको ब्यवस्थापन भए विस्तारै सबै समस्या हल हँुदै जान्थ्यो–सोहि गाउँकै अग्निपिडित सिता भण्डारीले भनिन । सरकारका निकायहरू र संघसंस्थाहरू सबै मिलेर हाम्रो वास बनाईदिनु पर्यो ।

राजपुर–७ को हाड्वास गाउँमा अगालागी भएपछि सिंगो गाउँ नै बिस्थापित भएको छ । सरकारका निकायहरू र केहि संघसंस्थाले खाद्यान्न राहात सहयोग गरेपनि आवास निर्माण गरि अग्निपीडितहरूको पुनस्र्थापनाका लागि नगद राहात आवश्यक भएको छ–वडा अध्यक्ष पुष्कर वलीले भने । खानेपानीको पाईप जलेपछि अग्निपिडितहरूलाई खानेपानीको समस्या भएको छ । अपांगता भएका नागरिक, गर्भवती महिला र जेष्ठ नागरिकहरू बिरामी हुने संभावना छ, उनीहरूलाई गाह्रो परिरहेको छ–अध्यक्ष वलीले भने । अगालागी भएपछि यहाँ आउने राहात सामग्रीको ब्यवस्थापन तथा वितरण गर्न म लगातार गाउँलेहरूसंग खुल्ला आकाशमै रात बिताएको छु । एकद्वार प्रणालीबाटै राहात वितरण भैरहेको छ । अब पीडितहरूको आवास निर्माणका लागि गाउँपालिकाबाट जस्तापाता र सामुदायिक वनबाट काठपातको जोहो गर्दै छौं उनले भने ।

त्यसो त राजपुर गाउँपालिकाले उनीहरूको पुनस्र्थापना गर्न आवास निर्माणका लागि आफूले सक्दो सहयोग गर्ने र अन्य क्षेत्र र संघसंस्थाहरूलाई पनि सहयोग गरिदिन आग्रह गरेको गाउँपालिकाका अध्यक्ष शरद कुमार बुढाथोकी बताउँछन । खानेपानी ब्यवस्थापनका लागि पनि हामीले बजेट छुट्टाएर काम सुरु गर्ने तयारीमा छौं–अध्यक्ष बुढाथोकीले भने ।

होटल ब्यवसायी संघद्वारा राहात वितरणः

अग्निपीडितहरूलाई तत्कालको समस्या समाधान गर्न बिभिन्न सरकारका निकायहरू र संघसंस्थाहरूबाटनगद तथा जिन्सी राहात जुट्ने क्रम जारी रहेको फिल्डमै खटिएका राजपुर–७ का वडा अध्यक्ष पुष्कर वलीले जानकारी दिए । यसैबिच गढवा होटल ब्यवसायी संघले सोही स्थानमा पुगी २० हजार १ सय नगद राहात प्रदान गरेको छ ।

अग्निपिडितहरूलाई एकद्वार प्रणालीबाट गरिएको राहात सहयोगमा लमही नगरपालिकाले १ लाख २५ हजार उपलब्ध गराउने प्रतिवद्धता जाहेर गरेको छ भने गढवा होटल ब्यवसायी संघले २० हजार, गोर्खा स्कूल लमहीले ३५ हजार, देउखुरी उद्योग बाणिज्य संघले १ लाख ५ हजार ९ सय पाँच, नेपाल औषधि ब्यवसायी संघले ४० हजार, स्वर्गद्धारी कश्यप सेवा समाजले ७८ हजार १ सय, समाजसेवी कमान सिंह खड्काले ३० हजार र पलबहादुर वलीले २० हजार नगद तथा जिन्सी सहयोग गर्नुभएको छ भने नेपाल रेडक्रस सोसाईटी, लालमटियाको क्लब, मानव कल्याण तथा वातावरण संरक्षण केन्द्र लगायतका संस्थाहरूले जिन्सी राहात उपलब्ध गराएको बताईएको छ ।à