खोज

नवलपुर, २० वैशाख ।

मुख्य राजमार्गले छोएको जिल्लाको सुगम मानिने गैंडाकोट नगरपालिकाको वडा नं. ३ ढोंडेनी गाउँका चार सय घर परिवार खानेपानीको सुविधाबाट वर्षौदेखि बञ्चित छन् ।

पुर्व–पश्चिम राजमार्गको गैंडाकोट नगरपालिका हरेक अवस्थाबाट सुगम र विकसित पालिकाका रुपमा रहेको भए पनि गैंडाकोटको मुुख्य राजमार्गबाट सात किलोमिटर उत्तरमा रहेको ढोंडेनी गाउँमा अझै खानेपानी पुगेको छैन । जसका कारण त्यहाँका चार सय घर परिवारका झण्डै दुई हजार दुई सय स्थानीय शुद्ध खानेपानीबाट बञ्चित हुनुपरेको गैंडाकोट नगरपालिका वडा नं. ३ का वडाध्यक्ष शिवकान्त तिवारीले बताए ।

नगरपालिकाको वडा नं. ३ मुख्य राजमार्गबाट उत्तरमा रहेको छ र यहाँको सबै भन्दा मुख्य समस्या भनेको खानेपानी नै हो । अहिले त वडा नं. ३ ढोंडेनी गाउँ भएर कालीगण्डकी करिडोरको निर्माण भै यातायात समेत सञ्चालन हुने गरेको छ र सुगम भएर पनि धेरै टाढाबाट पानी ल्याउन बजेटको समस्या भएकैले पनि यहाँका बासिन्दाले शुद्ध खानेपानी पिउन नपाएको वडाध्यक्ष तिवारी बताउँछन् ।

गाउँबाट मुहान करिब १२ किलोमिटर टाढा रहेको र अहिले पनि अस्थायी पाईप राखेर खानेपानी ल्याईएको भए पनि त्यो कहिले कहिले मात्र धारामा आउने गरेको तर शुद्ध नभएको भए पनि खानेपानी खान बाध्य रहेको स्थानीय टिएन आले मगर बताउँछन् ।

ढोंडेनी गाउँबाट खानेपानीको मुहान भएको गडम्दी खोला करिब १२ किलोमिटर टाढा रहेको र यहाँबाट खानेपानी योजना सञ्चालनका लागि आठ करोड भन्दा बढी रकमको आवश्यक पर्ने भएकाले पनि सो रकम जुुटाउनका लागि धेरै प्रयास गरे पनि सफल हुन नसकेको र अझै पनि सँघीय र गण्डकी प्रदेश सरकारको हरेक वर्ष ध्यानाकर्षण गराउने गरिएको भए पनि सुनुवाई नहुनु दुखको बिषय भएको गैंडाकोट नगरपालिकाका नगरप्रमुख मदनभक्त अधिकारीले बताए ।

चार सय घरपरिवारका करिब दुई हजार दुई सयको बसोबास रहेको ढोंडेनी गाउँमा अहिले स्थानीयले धेरैजसो कुवाको पानी खान बाध्य छन् भने धारामा कहिलेकहिले पानी आउने गरेको र पानी आउँदा घण्टौँ लाईनमा बस्नुपर्नै बाध्यताले हैरानी खेप्नुपरेको र अब सरकारले यसको दीर्घकालिन समाधान गर्नु पर्ने स्थानीय शिक्षक शम्भु तिवारीले बताए ।

सुगम गाउँ भएर पनि दुुर्गमको जस्तो ब्यवहार यहाँका जनताले भोग्नुपरेको छ । चुनावका समयमा भोट माग्दा यहाँका गाउँलेको एउटै प्रश्न खानेपानी चाहियो भन्ने हुन्छ । चुनाव जितेपछि त्यो आश्वासन पूरा गर्ने वचन पनि नेताले दिने गर्छन् तर चुनावका आश्वासन चुनाव सकिएपछि सबैले बिर्सिदिन्छन् । जनताको विश्वास दलप्रति गुम्दै जानु पनि एउटा यो कारक रहेको वडाध्यक्ष तिवारी बताउँछन् ।

नगरपालिकाले एउटै योजनामा करोडौँ खर्च गर्न सक्दैन । सबैतिर वितरण गर्दा ठूलो आयोजना प्रभावित हुुने गर्दछ । त्यसका लागि सँघीय र प्रदेश सरकार नै जिम्मेवार हुनुपर्ने नगरप्रमुख मदनभक्त अधिकारी बताउँछन् । अहिले लिफ्टिङ गरेर खानेपानी पुर्याउन अध्ययन भैरहेको उनी बताउँछन् ।

शुद्ध खानेपानी नपाउँदा सम्म अहिले स्थानीयले नजिकका कुवा, ताल तलैयाको सँरक्षण गरी त्यसैको उपयोग गरी खानेपानी प्रयोग गरिरहेका छन् भने अब सँघीय र प्रदेश सरकारको ढोकामा पुगेर स्थायी रुपमा योजना छनौट गर्न र जनताको नैसर्गिक अधिकारका लागि लड्ने वडाध्यक्ष तिवारीले बताए । सुगम मानिएको गैंंडाकोट नगरपालिकाको ढोँडेनी गाउँमा देखिएको खानेपानीको हाहाकारले सबैको ध्यान तान्न थालेको स्थानीय थानेश्वर रिमालले बताए ।