खोज

नेपालगञ्ज, १९ वैशाख ।

बाँकेको राप्तीसोनारी गाउँपालिकामा दैनिकजसो आगलागीका घटना हुने गरेका छन् । राप्ती सोनारी –८ बालापुर गाउँमा बुधबार दिउँसो आगलागी हुँदा तीनवटा घर पूर्णरुपमा जलेर क्षति भएको छ । दिउँसो साढे १२ बालापुरमा रहेको चुनलाल थारु, कमला गिरी र तुलसा गिरीको घर आगलागीबाट जलेर नष्ट भएको हो । छुट्टाछुट्टै तीनवटा घरमा आगलागी भएको खबर पाए लगत्तै सशस्त्र प्रहरी बल नं.४२ रिजर्भ गणबाट डीएसपी देवबहादुर बोहराको नेतृत्वमा खटिएको १०५ जना टोलीले आगो नियन्त्रणमा लिएको छ ।

करिब २ घण्टा लगाएर अग्नि नियन्त्रक उपकरणका साथै दमकलसहित गएको सशस्त्र प्रहरीको विपद् व्यवस्थापन टोलीले आगो नियन्त्रणमा लिए पनि अन्दाजी ३० लाख रुपैयाँको क्षति भएको सशस्त्र प्रहरीले जनाएको छ । एक्कासी सल्किएको आगो केहीबेरमै नियन्त्रण बाहिर जाँदा त्यहाँ रहेका लत्ताकपडा, गरगहना, घर पालुवा जनावर लगायत अन्न जलेर नष्ट भएको स्थानीयले बताएका छन् । नेपाली सेना, स्थानीय प्रहरी र स्थानीयहरुले आगलागी नियन्त्रण गर्न सशस्त्र प्रहरीलाई सहयोग गरेका थिए । तीन घर जल्दा अन्दाजी ३० लाख बराबरको धन सम्पत्ति नष्ट भएको अनुमान गरिए पनि आगलागीबाट क्षति भएको पूर्ण विवरण अझै आइनसकेको बताइएको छ ।

यसैविच राप्ती सोनारी गाउँपालिका–७ झगडिया गाउँमा मंगलबार साँझ आगलागी हुँदा ६ घर र तीनवटा गोठ जलेर नष्ट भएको छ । जिल्ला प्रहरी कार्यालय बाँकेका प्रहरी प्रमुख एसपी तुलबहादुर कार्कीले दिएको जानकारी अनुसार बच्चाहरू खेल्ने क्रममा रमेश गद्दीको घरबाट सुरु भएको आगलागीबाट गाउँका छ वटा घर र तीनवटा गोठ जलेर नष्ट भएको छ । नरैनापुर गाउँपालिकाको दमकल, प्रहरी र स्थानीय बासिन्दाको सक्रियतामा आगो नियन्त्रणमा आएको प्रहरीले जनाएको छ । दमकल समयमै आएकाले मानवीय क्षति नभएको बाँकेका प्रहरी प्रमुख एसपी कार्कीले बताए । हावाहुरीको मौसममा खाना पकाउँदा वा पकाइसकेपछि सावधानी अपनाउन सर्वसाधारणसँग आग्रह गर्दै आएको एसपी कार्कीले बताए । हावाहुरीको मौसममा जिल्लाको नरैनापुर र राप्ती सोनारी गाउँपालिकाका विभिन्न ठाउँमा हरेक वर्ष आगलागीका घटना हुने गरेको छ ।