खोज

बुटवल, १९ वैशाख ।

पहिलो पाईला नेपाल बुटवल शाखाको आयोजनामा ट्राफिक सचेतना प्रशिक्षण कार्यक्रम गरिएको छ । बिशेषगरी छोटो दुरीमा बुटवल नगर क्षेत्रभित्र नगरको अनुमति लिई सञ्चालनमा रहेका ईरिक्साको कारणले भएका सडक दुर्घटना, ट्राफिक नियमको अवज्ञा र सोको कारणले बढेको जोखिम साथसाथै सुरक्षित यात्राको निम्ति ईरिक्सा चालकहरुलाई लक्षित गरी कार्यक्रम गरिएको शाखा अध्यक्ष विनोद बस्यालले जानकारी दिए ।

कार्यक्रमलाई सम्वोधन गर्दै लुम्बिनी प्रदेशका आन्तरिक मामिला तथा कानुन मन्त्री दिनेश पन्थीले सवारी दुर्घटनाका कारणहरु मानवीय र प्राबिधिक रहेको औल्याउँदै मानवीय कारणहरुलाई हल गर्न सके आकस्मिक आउने प्राबिधिक कारणले ठुलो सम्भावित दुर्घटना तथा क्षति न्युनिकरण हुने बताएका थिए ।

साथै सडकको अवस्थाको कारणले हुने दुर्घटनातर्फ ईंगित गर्दै उनले देशको अबस्था, बिकासको गति, राज्यको कमजोर नियमन, लापरवाहीको कारणले सडकको स्तर सुध्रन नसकेको बताए । सडकमा हिड्ने पैदल यात्रु, सवारीमा सवार यात्रु देखि आफू र आफ्नो परिवार समेत रहेकोले संयमित भई ट्राफिक नियमको पालना गरी सवारी चलाउन उनले चालकहरुलाई अनुरोध गरे ।

मन्त्री पन्थीले आफ्नो मन्त्रालयको जिम्मेवारी तथा कामको जानकारी लिदै प्रदेश सरकारको क्षेत्राधिकार भित्र पर्ने कानुनको संशोधन, कानुन निर्माणको निम्ति आफ्नो प्रमुख प्राथमिकता रहेको र सोको लागि आफ्नो तहवाट सुझाव प्रदान गर्न समेत आग्रह गरेका थिए । कानुनी राज्यमा कानुन प्रमुख रहेको, कानुन भन्दा माथि कोही नरहेको र कानुनले सबैलाई समान नजरले देख्ने भएकोले कुनै कानुनमा संशोधन गर्न आबश्यक भए सुझाव पेश गर्ने आग्रह गरेका थिए ।
नेपाल प्रहरी राजमार्ग सुरक्षा तथा ट्राफिक ब्यबस्थापन कार्यालयका प्रमुख प्रहरी उपरीक्षक श्यामबाबू खत्रीले सानो सवारीमा जोखिम उच्च हुने, ट्राफिक नियम उल्लङ्घनमा साना सवारी बढी देखिने गरेको बताए ।

प्रदेशभर हरेक दिन साना सवारीको दुर्घटना दर उच्च भएको र हरेक दिन दुर्घटनाको कारण १–३ जना सम्मको ज्यान गएको जानकारी गराउँदै सानो कारणले ठुलो दुर्घटना भईरहेको, जसले गर्दा जनधनको क्षति भएको जसको कारण सवारी चालक रहेकोले सवारी चालकले जिम्मेवारीबोध गर्नुपर्नेमा जोड दिएका थिए । सडकमा बढ्दो सवारी चापको कारणले गर्दा सडक र सहर अस्तब्यबस्त भईरहेकोले ट्राफिक नियमको पालना गर्दा सोको न्युनिकरण हुने उनले बताए ।

कार्यक्रममा पहिलो पाईला नेपाल बुटवल शाखा सल्लाहाकार ठाकुर गैरे, हरियाली यातायात प्रालिका अध्यक्ष कृष्ण प्रसाद तिवारी, शाखा उपाध्यक्ष सन्तोष बन्जाडे, कार्यक्रम संयोजक कमल पोख्रेल, बुटवल शाखा अध्यक्ष विनोद बस्यालले कार्यको उद्देश्यको बारेमा सहभागीहरुलाई प्रष्ट पार्दै प्रशिक्षणबाट जिम्मेवारी चालक बन्न सबैलाई आग्रह गरेका थिए ।

कार्यक्रममा बुटवल नगरमा दर्ता भई नगर क्षेत्रभित्र स्रञ्चालनमा रहेका १५० बढी स्वरोजगार ईरिक्सा चालकलाई प्रहरी सहायक निरीक्षक राजु चौधरीले ट्राफिक नियमको बारेमा प्रशिक्षण प्रदान गरेका थिए । डा. सन्तोष क्षेत्रीले आँखाको ज्योतीको कारणले निम्तने सम्भावित सडक दुर्घटना र सोको न्युनीकरणका उपायको सन्दर्भमा सहभागीलाई प्रशिक्षण प्रदान गरेका थिए । कार्यक्रममा बुटवल नगरभित्र सञ्चालनमा रहेका स्वरोजगार ईरिक्सा चालकहरुको उपस्थिति रहेको थियो ।