खोज

सुनवल, १३ बैशाख । पश्चिम नवलपरासीका स्वास्थ्य बीमा सेवा उपलब्ध दुई वटा अस्पताललाई सरकारले बीमा बापतको रकम भुक्तानी नगर्दा सेवाप्रवाहमै समस्या आएको छ । सदरमुकाम परासीमा रहेको पृथ्वी चन्द्र जिल्ला अस्पताल र बर्दघाटमा रहेको चिसापानी अस्पताललाई बीमा बापतको झन्डै तीन करोड सोध भर्ना गर्न बाँकी छ । भुक्तानी नपाएपछि अस्पतालको सेवाप्रवाहमै असर परेको पृथ्वी चन्द्र अस्पतालका निमित्त प्रमुख मेडिकल सुपरिटेन्डेन्ट डाक्टर किरण पाण्डेले बताए ।

पृथ्वी चन्द्र अस्पताललाई स्वास्थ्य बीमा बोर्डले बीमा बापतलको १ करोड ९० लाख रूपैयाँ भुक्तानी गर्न बाँकी छ । गत आर्थिक वर्ष पनि प्रत्येक महिनाको खर्चको आधारमा पुरा भुक्तानी भएको छैन्, चालु आर्थिक वर्ष सुरु भएपछि त हाल सम्म कुनै रकम अस्पतालको खातामा आएको छैन्, मेसु पाण्डले भने । बीमा बापतको रकम भुक्तानी नहुँदा कर्मचारीहरूको तलब भत्ता, औषधी खरिददेखि ल्याबको लागि आवश्यक केमिकल समेत खरिद गर्न समस्या भएको छ ।

आवश्यक औषधि समेत रकम अभावकै कारण तत्कालै खरिद गर्न नसक्दा बीमावाला बिरामीलाई पनि निःशुल्क औषधि वितरण गर्न नसक्ने अवस्था सृजना भएको डाक्टर पाण्डेले बताए । औषधि तथा विभिन्न केमिकल खरिदका लागि टेन्डर आह्वान गर्ने हो, समयमा भुक्तानी हुन नसक्दा सप्लायर्सले पनि समयमै समान दिँदैन्, निकै समस्या भएको छ, डाक्टर पाण्डेले गुनासो गरे ।

पृथ्वी चन्द्र अस्पतालमा बीमावहाक बाहेकका बिरामी पनि आउने भएकाले हालसम्म सुचारु रूपले सेवाप्रवाह गर्न सकिएको अस्पताल प्रशासनले जनाएको छ । बीमावहाक बाहेकका बिरामीले भुक्तानी गर्ने रकमले जेनतेन सेवाप्रवाह भईरहेको पाण्डेको भनाइ छ । पृथ्वी चन्द्र अस्पतालमा अहिले बिरामीको चाप पनि बढेको छ । सबै बिरामी बीमावहाक हुने हो भने त बीमा सेवा बन्दनै गर्नुपर्छ तर ३० प्रतिशत बढि बीमा नभएका बिरामी उपचारका लागि आउने भएकाले उनीहरूले तिर्ने शुल्कको आधारमा अस्पताल चल्न सकेको हो, निमित्त मेसु पाण्डेले भने ।
उता बर्दघाटमा रहेको चिसापानी अस्पतालले पनि बीमा बापतको १ करोड बढि रकम सोधभर्ना बापत पाउन बाँकी छ । अस्पतालका निमित्त प्रमुख मेडिकल सुपरिटेन्डेन्ट मन्जिला घिमिरेले बीमा बापतको रकम भुक्तानी नहुँदा बीमा सेवानै बन्द गर्नुपर्ने अवस्थाको सृजना भएको बताईन । चिसापानी अस्पतालमा गत आर्थिक वर्षको आंशिक मात्रै भुक्तानी भएको छ भने चालु आर्थिक वर्षको १० महिनाको पुरा भुक्तानी बाँकी रहेको छ ।

दुवै अस्पतालले स्वास्थ्य बीमा बापतको सोधभर्ना रकम तत्कालै पठाउन पटक पटक ताकेता गरेपनि स्वास्थ्य बीमा बोर्डले चासो नदिएको अस्पतालहरूको गुनासो छ । अब पनि आंशिक भएपनि भुक्तानी नभए अस्पतालले खर्च धान्न नसकेर बिमा सेवा बन्द गर्नुपर्ने बाध्यता सृजना हुने देखिएको छ ।

सरकारले २०७२ सालबाट स्वास्थ्य बिमाको सुरुवात गरेको थियो । सेवा सुरु भएको स्वास्थ्य बिमाको ८ वर्ष बितिसक्दा समेत बिरामीले बिमाबापतको उपचारमा समस्या बेहोर्दै आइरहेका छन् भने सेवा प्रदायक अस्पतालहरूले बीमा सुविधा उपलब्ध गराएबापतको रकम नै पाउन सकेका छैनन् । जसका कारण अस्पतालले नै सेवा दिन नसक्ने अवस्था सृजना हुन थालेको हो ।