खोज

बुटवल,११ बैशाख ।   नेपाल मगर महिला संघ बुटवलले संघको ८ औं जिल्ला अधिवेशनमा बुटवल नगर समितिलाई जानकारी नदिइएको र प्रतिनिधि सहभागी नगराइएको भन्दै अधिवेशन रद्द गर्न माग गरेको छ । यही बैशाख ८ गते तिलोत्तमाको कुञ्जलापुरमा भएको अधिवेशनमा नेतृत्वले एकपक्षीय गरेको भन्दै मगर महिला संघ बुटवल उपमहानगर समितिले रद्द गर्न माग गरेको हो ।

मगर महिला संघ रुपन्देहीको जिल्ला नेतृत्वले मगर महिला संघ केन्द्रीय समितिको निर्देशन तथा अध्यक्षको आग्रहलाई समेत बेवास्ता गरी एकपक्षीय रुपमा अधिवेशन गरेकाले रद्द गरिनुपर्ने आफूहरुको माग रहेको संघको बुटवल अध्यक्ष गौरीमाया थापाले बताइन् । संघको जिल्ला र प्रदेश नेतृत्वले गरेको यस्तो कार्यले मगर महिलाहरुलाई विभाजित गरेको थापाले बताइन् ।

मगर महिला संघलाई केही सीमित व्यक्तिको स्वार्थ अनुसार राष्ट्रिय जनमुक्ति पार्टीको भातृ संगठन बनाउन खोजिएको मगर महिला संघ बुटवल उपमहानगर समितिकी पूर्व अध्यक्ष तथा सल्लाहकार कुमारी थापाले बताइन् । जिल्ला अधिवेशनमा गएका नगर समितिका प्रतिनिधिलाई मगर संघका केन्द्रीय सचीव गिता सारु मगर, महिला संघका जिल्ला अध्यक्ष चन्दा थापा, प्रदेश अध्यक्ष केशरी तरामुको योजना र निर्देशनमा फोनिज रुपन्देहीका अध्यक्ष सोनु थापा र मगर संघ, बुटवल उपमहानगर समितिका सचिव हेमन्त बुढाथोकी लगायतले अराजक व्यवहार गरेको मगर महिला संघ बुटवल नगर समिति सचिव तिर्थकुमारी सोमरेले गुनासो गरिन् ।

जिल्ला र प्रदेश नेतृत्वले बुटवलमा आधिकारिक नगर समिति हुंदाहुंदै खवैधरुपले खर्को समिति बनाएपनि गौरीमाया थापाको नेतृत्वलाई नै केन्द्रले मान्यता दिएको बताइन् । तत्कालिन कोषाध्यक्ष सरिता श्रीसलाई अध्यक्ष तथा सचिव नारायणी पाटालाई नेतृत्वमा ल्याएर जिल्ला समितिले आधिकारिक समितिलाई मान्यता नदिएको संस्थापक तथा पूर्व अध्यक्ष ओमी पुनले जानकारी गराइन् । नेपाल मगर महिला संघ, केन्द्रीय समिति काठमाण्डौले २०८०–०६–२३ गते एक पत्र लेख्दै गौरीमाया थापाको नेतृत्वलाई आधिकारिकता दिए पनि राजनीतिक प्रतिसोधनमा जिल्ला र प्रदेश अध्यक्षले निर्णय र निर्देशनलाई कार्यान्वयन गर्न नमानेको पुनले उल्लेख गरिन् ।

२०७९ साल चैत्र १८ गतेका दिन सातौ साधारण सभा तथा तेश्रो अधिवेशनबाट गौरीमाया थापाको नेतृत्वमा १८ सदस्यीय कार्य समिति विधिवत रुपमा चयन गर्दै सम्पन्न भएपनि केन्द्रले मान्यता दिएको समितिलाई प्रदेश र जिल्ला समितिले मान्यता नदिएपछि विवाद उत्पन्न भएको हो । मगर महिला संघ रुपन्देहीकी अध्यक्ष चन्दा थापा र प्रदेश अध्यक्ष केशरी गाहाले भने अधिवेशनमा कुनै पनि विवाद नभएको र राजनीतिक प्रभाव नभएको दाबी गरे ।