खोज

नवलपुर, ११ वैशाख ।

पुर्वी नवलपरासीमा यस बर्ष गहुँ खेती राम्रो फस्टाउन नसक्दा उत्पादनमा ह्रास आउने भएपछि किसानहरु चिन्तित बनेका छन् ।

विशेष गरी यो वर्ष गहुँ खेती गर्ने मौसममा बर्षा नहँुदा बाली फस्टाउन नसकेको र जसका कारण गहुँ उत्पादनमा ह्रास आएको गैडाकोटका कृषक ओमबहादुर घिमिरेले बताए ।

लामो समयसम्म पानी नपर्नु र मौसम समेत प्रतिकूल हुँदा यो बर्ष गहुँ खेती खासै फस्टाउन नसकेको किसानले बताए । “वर्षा समयमा हुन नसक्दा धेरैको गहुँ खेतमा कोशा नै लाग्न सकेको छैन”– कृषक रामप्रसाद थापाले भने । यसरी किसानहरुले उत्पादन गरेको गहुँ राम्रो फल्न नसक्दा किसानहरुले गहुँ खेती छाड्न सक्ने रजहरका कृषक पदम हमालले बताए ।

“केही दिनअघि पानी पर्यो, त्यो पानीले कोशा लाग्दै गरेको गहुँ बालीमा असर गर्यो र गहुँ खेती झरीले बिगारेपछि यसवर्ष गहुँको अनिकाल पर्ने कृषक सूर्यपाल मिश्राले जानकारी दिए । १४ कठ्ठा क्षेत्रफलमा गहुँ खेती गरेका कृषक मिश्राले गहुँ उत्पादनमा ह्रास आउँदा लागत समेत नउठ्ने बताए ।

गहुँ उत्पादनमा यसवर्ष अघिल्लो वर्षको तुलनामा करिब ३० प्रतिशत सम्म कमी आउने कृषि ज्ञान केन्द्र नवलपुरले जनाएको छ । पछिल्लो समयमा गहुँ खेती गर्ने किसानहरु घट्दै जान थालेपछि यसतर्फ आकर्षण समेत घट्दै गएको ज्ञान केन्द्रका कृषि अधिकृत सञ्जय ढकालले बताए । गहुँमा दाना लाग्ने बेलामा पानी परेकाले गहुँमा कमी आउने ढकालले बताए ।

पुर्वी नवलपरासीमा गत वर्ष आठ हजार ३० हेक्टर क्षेत्रफलमा गहुँ खेती गरिएको तर यो वर्ष सात हजार हेक्टरमा मात्र गहुँ खेती गरिएको र उत्पादन समेत घट्ने कृषि ज्ञान केन्द्रले जनाएको छ । गत वर्ष जिल्लामा वार्षिक १६ हजार दुई सय ६९ मेट्रिक टन गहुँ उत्पादन भएकोमा यो वर्ष मुस्किलले ११ हजार मेट्रिक टन उत्पादन भएको अधिकृत ढकालले बताए ।

गहुँ खेतीमा अहिले बढी मेहनत गर्नुपर्ने र खासै उत्पादन समेत राम्रो नहुने भएकाले वर्सेनि यसतर्फ कृषकको सँख्या घट्दै जानु चिन्ताको बिषय भएको कृषि विज्ञ षडानन्द जैसीले बताए ।

जिल्लामा गैंडाकोट, देवचुली, कावासोती, मध्यबिन्दु नगरपालिकामा बढी गहुँ खेती गरिने गरेको कृषि ज्ञान केन्द्रको तथ्याँकमा छ ।