खोज

बुटवल, ९ वैशाख ।

ऐतिहासिक, धार्मिक, साँस्कृतिक र पुरातात्विक महत्व बोकेको बुटवलको समग्र विकासका लागि संघ, प्रदेश र स्थानीय सरकारका साथै निजी क्षेत्रसँगको हातेमालो अपरिहार्य रहेको सरोकारवालाले बताएका छन् ।

बुटवललाई तराई र पहाडको संगमस्थल मानेर विकास गर्न सकियो भने समृद्ध बुटवल निर्माण गर्न सकिने उनीहरुको भनाई छ ।

बुटवल पब्लिकेशन प्रालिको आयोजना र बुटवल उपमहानरपालिकाको सहयोगमा ‘बुटवलः हिजो, आज र भोली’ विषयमा आयोजित अन्तरसंवादमा सरोकारवालाहरुले यस्तो बताएका हुन् ।

कार्यक्रमको उदघाटन गर्दै बुटवल उपमहानगरपालिकाका नगरप्रमुख खेलराज पाण्डेले बुटवलको विकाससँग संघ–संस्थाहरुको योगदानबारे प्रकाश पार्दै फेरि पनि एकीकृत विकासको योजनासहित अघि बढ्न जरुरी रहेको बताए ।

बुटवल उपमहानगरले शिक्षा, स्वास्थ्य, भौतिक पूर्वाधार, कृषि, पर्यटन, स्वास्थ्य लगायतका क्षेत्रमा अगाडि सारेका योजनाहरुको चर्चा गर्दै नगरप्रमुख पाण्डेले इतिहासलाई जोगाएर भविष्यप्रति गर्व गर्न लायक बुटवल निर्माण गर्न सकिने र यसका लागि सबैको सामूहिक पहलकदमी आवश्यक रहेको बताए । उनले बुटवलले कुल बजेटको २६ प्रतिशत शिक्षामा खर्चिएको भन्दै यसबाट पनि उपमहानगरपालिकाले आगाडि सारेका योजना र विकासको सार्थकता झल्किने बताए ।

कार्यक्रममा बोल्दै अधिकांश सहभागीहरुले विगतका सम्पदा, विकास, कला सांस्कृतिक सम्पदालाई साक्षी राख्दै वर्तमानमा भएका गतिविधिहरुलाई अझ बढी परिस्कृत ढंगले अगाडि बढाएर समृद्ध बुटवलको परिकल्पना गर्नुपर्नेमा जोड दिएका थिए । सहभागीहरुले विगतमा पनि बुटवलले बस्तु विनिमय, शिक्षा र औद्योगिक क्षेत्रमा समेत देशकै नेतृत्व गर्दै आएको स्मरण गर्दै अहिलेको अवस्था परिमार्जित भएकोले यसलाई थप परिस्कृत गरेर अगाडि जानुपर्ने सुझाव समेत दिएका थिए ।

बुटवल शिक्षा, स्वाथ्य क्षेत्रको हवको रुपमा विकास हुँदै जानु आफैमा गौरवको विषय भएको भन्दै यहाँ रहेका ऐतिहासिक, पुरातात्विक संरचनालाई जोगाउँदै पर्यटन, बस्त विनिमय र व्यापारको माध्यमबाट बुटवलाई पुनः गुल्जार बनाउन सकिनेमा सरोकारवालाले जोड दिएका छन् ।

कार्यक्रममा बोल्दै बुटवल पब्लिकेशन प्रालिका अध्यक्ष हरि प्रसाद पौडेलले बुटवलको विकासमा सबैको सहकार्य आवश्यक रहेको बताएका थिए ।

कार्यक्रममा बुटवल हिजो र आजको अवस्थाको विषयमा विश्लेषक युवराज कंडेलले कार्यपत्र प्रस्तुुत गरेका थिए भने अर्का अनुसन्धानकर्ता रामचन्द्र श्रेष्ठले भोलिको बुटवल कस्तो हुने भन्ने विषयमा आफ्नो कार्यपत्र प्रस्तुत गरेका थिए । कार्यक्रममा बुटवल टुडे दैनिक पत्रिकाका सम्पादक कृष्ण मल्लको संयोजनमा भएको हो ।