खोज

बुटवल, ३ वैशाख ।

नेकपा एमालेका केन्द्रीय सचिव तथा पुर्व मन्त्री छविलाल बिश्वकर्माले परिवर्तनबाट प्राप्त भएका उपलब्धिहरुलाई जोगाउनको लागि मुक्ति समाजले सकारातमक पहलकदमी लिनुपर्ने बताएका छन् ।

नेपाल उत्पीडित जातिय मुक्ति समाज लुम्बिनी प्रदेश कमिटीको आयोजनामा पुष्पलाल स्मृति भवन सुख्खानगरमा नवबर्ष २०८१ को शुभकामना आदानप्रदान, संगठनको विस्तारित बैठक तथा भित्तेपात्रो विमोचन कार्यक्रममा उनले यस्तो बताएका हुन् ।

“यो लोकतान्त्रिक गणतन्त्र, संघीयता, धर्मनिरपेक्षता हामी जस्तो पिछडिएको वर्गको लागि चाहिएको हो, दलित मुक्ति आन्दोलनले नेपालको राजनीतिक परिवेशमा ठुलो योगदान गरेको छ”–विश्वकर्माले भने ।

कार्यक्रममा एकपा एमाले पोलिटब्यूरो सदस्य दधिराम न्यौपानेले मुक्ति समाजको काम समाज रूपान्तरको लागि अत्यन्तै महत्वपूर्ण रहेको भन्दै अव जातिय कुरामा अल्झिन नहुने बताए ।

नेकपा एमाले लुम्बिनी प्रदेश अध्यक्ष राधाकृष्ण कंडेलले पार्टी अब नयाँ गतिले अगाडि बढ्न थालेकोले मिसन ८४ लाई मूल लक्ष्य बनाएर अघि बढ्न मुक्ति समाजलाई आग्रह गरे ।

मुक्ति समाजका केन्द्रीय उपाध्यक्ष नन्द विश्वकर्माले दलित मुक्ति संगठनमा भोटर उत्पादन गरेपनि कार्यकर्ता उत्पादन गर्न नसक्दा अहिले संगठनमा कार्यकर्ताको खडेरी पर्न थालेको भन्दै यसतर्फ सचेत बन्नुपर्ने बताए ।

नेपाल उत्पीडित जातिय मुक्ति समाज लुम्बिनी प्रदेश कमिटीका अध्यक्ष कृष्ण विश्वकर्माले तीन महिने अभियान चलिरहेको भन्दै यसलाई सफल बनाउन आफ्नो ठाउँबाट लाग्न आग्रह गरे । साथै मुक्ति समाजको जिल्ला वशनहरुलाइ पनि सम्मन्न गर्न उनले आग्रह गरे । कार्यक्रममा उपाध्यक्ष पुरन बिश्वकर्मा, सागर परियारलगायतले पनि बोलेका थिए ।