खोज

नवलपुर, २ वैशाख ।

पुर्वी नवलपरासीको पहाडी बुलिङटार र तनहुँको रिसिङ गाउँपालिकाको गडगडी घाटको कालीगण्डकी नदीमा निर्माणाधीन पककी पुलको निर्माण शुरु भएको आठ बर्ष बित्न लाग्दा अहिले सम्म तीन पिल्लर मात्र बनाएर ठेकेदार फरार भएका छन् । जसका कारण पुल निर्माण अलपत्र परेको छ ।

कालीगण्डकी करिडोर र दलदले बुलिङटार भएर कोखेबाट तनहुँको रिसिङको मधुवन हुँदै रुपटार भएर भिमाद पुग्न यो पक्की पुलको निर्माण शुरु गरिएको भएको थियो । शिलन्यास भै काम शुुरु भएको अहिले ८ वर्ष पुग्यो, तर तीन बर्षमा सक्ने गरी अघि बढेको सो पुल अहिले अलपत्र अवस्थामा पुगेपछि स्थानीयले सँघीय सरकार, प्रदेश सरकारको ध्यानाकर्षण गराएका बुलिङटार गाउँपालिकाका वडा नं. ४ का पुर्व सदस्य सोम पुलामी मगरले बताए ।

“कालीगण्डकीमा सँघीय सरकारको बजेटबाट यहाँ पक्की पुलको निर्माण सुरु भएको दश बर्ष बित्न लाग्यो तर अहिले सम्म पुलको तीन वटा खम्बा मात्र कालीगण्डकीमा बनेका छन्, त्यो भन्दा बढी कामै हुुन सकेको छैन”–स्थानीय बुलिङटार ४ का पुर्व वडाध्यक्ष चेत बहादुर गोदामी मगरले भने, “छ महिना अघि ठेकेदार देखा परेको थियो तर अहिले फेरी गायब भैसक्यो यो पुल कहिले सम्म अलपत्र पर्ने हो ठेगान नै छैन ।”

कालीगण्डकी नदीमा बन्न लागेको पक्की पुलको ठेक्का पाएको कम्पनी नाघा अर्जुुन कन्स्ट्रक्सनले तीन वर्षमा सक्ने गरी ठेक्का लिएको थियो । “आठ बर्ष बित्न लाग्यो अहिले सम्म २० प्रतिशत पनि काम हुन सकेको छैन, यो अत्यन्त दुुखको बिषय हो”–बुलिङटार गाउँपालिकाका अध्यक्ष दिपेन्द्र सुनारी मगरले भने ।

यो पुल निर्माण अलपत्र परेपछि यसको ठेकका लिएको ठेकेदारको बारम्बार खोजी गरिरहे पनि पत्ता लगाउन नसकिएको र अहिले नवलपुर र तनहुँ दुवै जिल्ला प्रशासनको ध्यानाकर्षण गराइएको तनहुँ स्थित रिसिङ गाउँपालिकाका अध्यक्ष राजेन्द्रकृष्ण श्रेष्ठले बताए ।

तनहुँसँग सिमा जोडिएको कालीगण्डकी नदीमा बन्दै गरेको पक्की पुल अलपत्र अवस्थामा पुगे पछि स्थानीय समेत आन्दोलित भएका छन् । पुल समयमा सक्नुपर्नेमा आठ वर्ष बित्न लाग्दा पनि पुल बन्ने छाँटकाँट नै नभएपछि प्रशासन गुहारेको बुलिङटार ४ का वडाध्यक्ष मिनबहादुर आले मगरले बताए ।

तनहुँको रिसिङ गाउँपालिकाका अध्यक्ष राजेन्द्रकृष्ण श्रेष्ठले भने, “ठेकेदार नै यसमा दोषी रहेकोले सो पुल बन्ने कुनै गुन्जायस् नै छैन, अझै दश वर्ष पुल बन्ने छाँटकाँट नै छैन ।” ठेकेदारको गम्भीर लापरबाहीले पुल बन्ने कुनै अवस्था नै छैन । सरकारको पटक पटक ध्यानाकर्षण गराएपछि कुनै सुनुवाई नै नभएको अध्यक्ष श्रेष्ठले बताए ।

ठेकेदार नै फरार भएपछि अहिले ठेकेदारको खोजीका लागि पुर्वी नवलपरासी र तनहुँ जिल्ला प्रशासनमा निवेदन परेको छ र खोजीका लागि दुवै प्रशासनले ताकेता गरिरहेका जनाएका छन् ।