खोज

तिलोत्तमा,२ बैसाख ।   रुपन्देहीको मणिग्राममा सञ्चालित एनजी मार्केटले डेढ करोड मूल्य बराबरको पहिलो पुरस्कार सार्वजनिक गरेको छ । मार्केटले आफ्ना एक हजार जना ग्राहकलाई दश प्रकारका उपहार दिने गरी अफर ल्याएको थियो ।

उपहार योजनाको पहिलो पुरस्कार अर्थात बम्पर उपहारमा भलबारीस्थित एनजी आवासमा १० धुर जग्गामा निर्माण हुने १ हजार ६ सय स्क्वायर फुटको साढे २ तले घर रहेको थियो ।

यो पुरस्कार तिलोत्तमा १ ड्राइभरटोलका योगेन्द्र बस्नेतले पाएका छन् । बस्नेतले एनजी मार्केटमा चारपटकमा करिब ४० हजारको सामान खरिद गरेर ४ वटा लक्की ड्र कुपन पाएका थिए । शनिबार पत्रकार र एनजी मार्केटमा सामान खरिद गरेका ग्राहकको रोहबरमा खोलिएको लक्की ड्र मार्फत योगेन्द्रले पुरस्कार पाएका हुन् । बस्नेत क्रिमसन कलेजका प्राध्यापक हुन् ।

लक्की ड्र खोलेर विजेता घोषणा गर्दा योगेन्द्र भने नयां वर्ष मनाउन पोखरा घुम्न गएका थिए । डेढ करोडको घर पाउने भएपछि योगन्द्रले आफू भाग्यमानी भएको प्रतिक्रिया दिए ।

‘मैले चार पटकमा करिब ४० हजारको सामान किन्दा ४ वटा कुपन पाएको थिएं,त्यसमध्ये २०८० साउन ९ गते सामान किन्दा पाएको कुपनले मलाई डेढ करोडको घर दिलायो’ –न्युज बुटवलटुडेसंग कुरा गर्दै उनले भने–‘आफ्नै नगरमा झण्डै २ अर्ब लगानी गरेर स्थानीय युवाले सञ्चालन गरेको सुविधासम्पन्न मार्केटलाई प्रोमोट गर्नुपर्छ भन्ने मान्यताले सामान खरिद गर्न जाने गरेको थिएं, भाग्यले डेढ करोडको घर पनि पाएको थाहा पाउदा खुशीको सीमा रहेन ।’    आफ्नो घर बनिसकेकाले उपहार पाएको घर के गर्ने भन्ने अझै निर्णय गर्न नसकेको योगेन्द्रले बताए ।

मार्केटमा चाहे अनुसार सामान उचित मूल्यमा पाउनुका साथै रमाउन र भुल्न क्याफे,रेष्टुरा,बाल उद्यान लगायत पुर्वाधारले सपिङको नौलो अनुभुति पनि मिलेको बस्नेतले बताए ।
उपहार सार्वजनिक कार्यक्रममा बोल्दै मार्केटका अध्यक्ष नारायण बन्जाडेले ग्राहकको सन्तुष्टीलाई पहिलो प्राथमिकतामा राखेर ब्राण्डिङ पनि गर्ने उद्देश्यले पहिलो पुरस्कार घर सहित एक हजार वटा पुरस्कार वितरण गर्ने योजना रहेको बताए ।

बांकी ९९९ वटा पुरस्कार मार्केटको ग्राण्ड ओपनिङमा वितरण गरिने उनले बताए । एनजी मार्केटमा एकपटकमा ५ हजार वा पटक पटक १० हजार रुपैयांको सामान खरिद गर्दा एउटा–एउटा कुपन पाइन्छ । ती कुपन जम्मा गरेर राखिने र लक्की ड्र मार्फत सार्वजनिक गरिने उनले बताए । उपहार योजनामा मार्केट सञ्चालक र कर्मचारी सहभागी हुन नपाउने र पूर्णत पारदर्शी एवं विश्वसनीय ढंगले उपहार सार्वजनिक गरिने मार्केटका प्रबन्ध निर्देशक आवास बन्जाडेले बताए ।

उपहार योजनाअन्तर्गत अब पछि हुने ग्राण्ड ओपनिङमा एक जनालाई किया ब्राण्डको कार, एक जनालाई रोयल इनफिल्ड ३५० सीसीको बुलेट मोटरसाइकल, एक जनालाई भेस्पा स्कुटरसमेत प्रदान गरिनेछ ।

यस्तै १५ जनालाई एक टन क्षमताको एयर कन्डिसनर, १५ जनालाई सिंगल डोर फ्रिज, १५ जनालाई टप लोड वासिङ मेसिन, २५ जनालाई ५५ इन्चको टेलिभिजन, १२५ जनालाई राइस कुकर र ८०१ जनालाई क्लोथ आइरन गरी १ हजार जना ग्राहकलाई उपहार प्रदान गरिनेछ । उपहार योजनामा सहभागी हुन दैनिक घरायसी सामान खरिद गर्दा एनजी मार्केटको ग्राहक सदस्यता लिनुपर्ने नियम बनाइएको छ ।

उपहार सार्वजनिक कार्यक्रममा मार्केटका व्यवस्थापक दीपक भट्टराई,सञ्चारकर्मी खेमराज रेग्मी लगायतले स्थानीय युवा उद्यमीले ठूलो लगानी गरेर ,थुप्रैलाई रोजगारी समेत दिएको मार्केटलाई दीगो सञ्चालनमा सबैको साथ र सहयोग हुनुपर्ने बताए ।