खोज

बुटवल, १ बैशाख । नेपाल बुद्धिचाल महासंघको नवौं तथा विशेष साधारणसभा काठमाण्डौमा सम्पन्न भएको छ । साधारण सभाले महासंघमा रिक्त रहेका अध्यक्ष, वरिष्ठ उपाध्यक्ष र उपाध्यक्ष पदको टुगो लगाएको छ । ललितपुरको च्यासल स्थित तुल्सिलाल स्मृति प्रतिष्ठानमा भएको निर्वाचनमा अध्यक्ष पदमा हेराकाजि महर्जन विजयी भए । हेराकाजि महर्जनले ४९ मत प्राप्त गरेका थिए भने उनको प्रतिद्वन्द्वी प्रविण भँडेलले ३१ मत प्राप्त गरे ।

वरिष्ठ उपाध्यक्ष ईलामका दिपेन राई निर्विरोध निर्वाचित भएका छन् । उपाध्यक्ष पदका लागि भएको निर्वाचनमा बुटवलका माधव प्रसाद प्रधान विजयी भएका छन् । प्रधानले ४२ मत प्राप्त गरेका थिए भने बारा जिल्लाका राजाबाबुले ३६ प्राप्त गरेका छन् ।

बुद्धिचाल महासंघको निर्वाचनमा सात प्रदेशका ३५, ५५ जिल्लाका ५५, कार्यसमितिका २१ पदाधिकारी, टेक्निकल २, राष्ट्रिय च्याम्पियन २ र राखेप मनोनीत २ गरि ११८ जनाको सभा मध्ये जम्मा ८४ जना प्रतिनिधिको उपस्थिति रहेको थियो । वरिष्ठ उपाध्यक्ष ईलामका दिपेन राई निर्विरोध निर्वाचित भएका छन् ।

निर्वाचनमा नेपाल खेलकुद महासंघ, नेपाल खेलकुद महासंघ समाजवादी र अखिल नेपाल खेलकुद महासंघको तर्फबाट अध्यक्ष पदमा हेराकाजि महर्जन, वरिष्ठ उपाध्यक्षमा दिपेन राई र उपाध्यक्षका लागि राजाबाबु रौनियारले उम्मेदवारी दर्ता गराएका थिए । नेपाल लोकतान्त्रिक खेलकुद संघको तर्फबाट अध्यक्ष पदमा प्रविण भँडेल र उपाध्यक्ष पदमा माधव प्रसाद प्रधानले उम्मेद्बारी दिएका थिए । साधारणसभाको राष्ट्रिय खेलकुद परिषद् (राखेप) सदस्यसचिव टंकलाल घिसिङ्गले उद्घाटन गरेका थिए ।

नेपाल बुद्धिचाल महासंघको नवौं साधारणसभा पश्चात् २० जनाको कार्य समितिले अध्यक्ष हेराकाजि महर्जनको नेतृत्वमा बाकी रहेको ३ वर्षे कार्यकाल पूरा गर्नेछन् । जसमा संस्था सञ्चालनमा कुशल मानिने महासचिव धरम बहादुर लामाको सहकार्य रहनेछ ।