खोज

बुटवल, २७ चैत । अपाङ्गता भएका व्यक्तिहरूलाई नेपाल सरकारबाट ‘क’ बर्गको परिचय पत्र प्राप्त गरेकाहरूको लागि मासिक ३ हजार ९ सय ९० सामाजिक सुरक्षा भत्ता दिँदै आएको छ । ‘ख’ बर्गको लागि भने २ हजार १ सय २८ रूपैयाँ उपलब्ध गराउँदै आएको छ । यसको अलवा अपाङ्गता भएका व्यक्तिहरूको अन्य बर्गलाई कुनै पनि सामाजिक सुरक्षा भत्ता छैन ।

तर बुटवलमा रहेको एउटा संस्थाले भने अपाङ्गता भएका व्यक्तिहरूलाई नियमित रूपमा भत्ता दिँदै आएको छ । सुन्दा जो कोहीलाई पनि नौलो लाग्ने यो अपाङ्गता भत्ता जो कोहीले भने पाउँदैनन । वि.सं. २०३१ सालमा स्थापना भएको यातायात मजदुर तथा व्यवसायी भलाई कोष केन्द्रीय कार्यालय बुटवलले वि.सं. २०५५ सालदेखि नै अपाङ्गता भएका आफ्नो सेवा ग्राहीहरू जो दुर्घटनामा परेर अंगभंग भएर कुनै पनि प्रकृतिको अपाङ्गता भएको भएपनि नियमित रूपमा भत्ता उपलब्ध गराउँदै आएको हो । वि.सं. २०५० सालमा संस्था स्थापना भएको २५ आंै बर्ष स्थापनाको अवसरमा घोषणा गरिएको यो भत्ता कार्यक्रम अनुसार हाल सम्म सयौंको संख्यामा उनीहरूले सेवा लिएका छन् ।

यातायात मजदुर तथा व्यवसायी भलाई कोष बुटवलका अध्यक्ष दिनेश फुल्लेलका अनुसार सुरुवाती दिनमा मासिक ३ सय रूपैयाँ अपाङ्गता भत्ता उपलब्ध गराउँदै आएकोमा अहिले मासिक २ हजार २ सय रूपैयाँ प्रदान गरिँदै आएको छ ।

रजत महोत्सवको अवसरमा सुरुवात गरिएको यो कार्यक्रम अनुसार दुर्घटनामा परि उपचार गर्दा पनि निको नभएर अपाङ्गता भएका यातायात व्यवसायी, मजुदुर सदस्यहरूको लागि नियमित रूपमा भत्ता प्रदान गर्दै आएको अध्यक्ष फुल्लेलले जानकारी दिए । उनका अनुसार अहिले १८ जनाले नियमित रूपमा भत्ता पाउँदै आएका हुन ।

यातायात मजदुर तथा व्यवसायी भलाई कोषमा सदस्य भएर यातायात क्षेत्रमा काम गर्दै गर्दा, दुर्घटना भएर घाईते हुँदा सदस्यहरूले १५ लाख रूपैयाँ बरारबरको उपचार खर्च समेत पाउँदै आएका छन् । यसको अलवा निको नहुने गरी अपाङ्गता भएमा नियमित रूपमा २ हजार २ सय रूपैयाँ भत्ता उपलब्ध गराउँदै आएको महासचिव योग बहादुर गुरुङ्गले जानकारी दिए । यसको अलवा भलाई कोषले उमेर हद पुरा भएका सदस्यहरूको लागि एकमुष्ट ५ हजार रूपैयाँ दिँदै आएको छ भने यातायात मजदुरको मृत्यु भएमा एकमुष्ट आर्थिक सहयोग गर्दै आएको छ । जसमा बीमा बापतको रकम त छदै छ त्यसमा थप सहयोग भलाई कोषले दिँदै आएको हो । साधारण सदस्यहरूलाई सामान्य औषधी उपचार बापत ४ हजार, अप्रेशन गर्नुपर्ने भएमा ८ हजार र एक बर्ष नियमित कोष शुल्क बुझाएका व्यवसायी धनिहरूलाई २ लाख रूपैयाँको दुर्घटना बीमा समेत गराएको छ ।

बुटवलमा केन्द्रीय कार्यालय रहेको यातायात मजदुर तथा व्यवसायी भलाई कोषले देशका ६ वटा प्रदेशमा काम गर्दै आएको छ । दुई पांग्रे र चार पांग्रे सवारी साधानको नियमित भलाई कोषको काम गर्दै आएको छ । जसमा संस्थागत रूपमा निजी दुई पांग्रे स्कुटर वा मोटरसाईकल चालकहरूको पनि सदस्य बनाएर सेवा प्रदान गर्दै आएको हो । जसमा रूपन्देही, नवलपरासी र कपिलवस्तु मात्रै जिल्ला समेटिएका छन् भने चार पांग्रे साधानको भने नेपालको सुदुरपश्चिम प्रदेश बाहेक अन्य ६ प्रदेशका ३६ वटा जिल्लामा शाखा कार्यालय स्थापना गरी काम गर्दै आएको छ । संस्थामा हाल ३ हजार व्यवसायीहरू आवद्ध छन् । सवारी साधानको सदस्य बनेर बीमा गर्दा व्यवसायी वा मजदुरले १५ लाख रूपैयाँ सम्म उपचार खर्च ३ लाख सम्म दुर्घटना बीमा थप पाउदै आएका छन् ।