खोज

नेपालगञ्ज, २७ चैत ।

भारतको बेतालघाट नजिकै भएको सडक दुर्घटनामा परेर बाँकेका ६ जनाको मृत्यु भएको छ । भारतको नैनीतालमा मजदुरी गरेर घर फर्कने क्रममा सडक दुर्घटनामा परी बाँकेका ६ जनाको मृत्य भएको हो ।

सोमबार राति भएको सडक दुर्घटनामा बैजनाथ गाउँपालिका –८ फत्तेपुर टिटिहिरियाका ४५ वर्षीय धिरज थारु, ५५ वर्षीय उदयराम थारु, ५० वर्षीय विश्राम थारु, सोही वडाको थपुवा गाउँका ५१ वर्षीय तिलकराम थारु, ४२ वर्षीय अन्तराम थारु, ४२ वर्षीय बिनोद थारुको घटनास्थलमै मृत्यु भएको भारतीय प्रहरीलाई उदृत गर्दैै बाँकेका प्रमुख जिल्ला अधिकारी श्रवणकुमार पोखरेलले जानकारी दिए ।

सोही घटटनामा परेर बाँके बैजनाथ ८ थपुवाकै ४२ वर्षीया शान्ति भन्ने लौटी थारु र दशरथ थारु गम्भीर घाइते भएका छन् । बेतालघाटबाट टनकपुर हुँदै नेपाल फर्कने क्रममा भएको सडक दुर्घट्ना सोमबार रातिको भए पनि मंगलबार दिउँसो मात्र जानकारीमा आएको थियो ।

प्रजिअ पोखरेलले घटनाको जानकारी आउने बित्तिकै प्रहरी परिचालित गरी यकिन पत्ता लगाउने काम भईरहेको बताए । स्थानीय प्रेम खत्रीका अनुसार केही महिना अघिमात्र उनीहरु मजदुरीको लागि भारतको नैनीताल गएको र फर्कने क्रममा सो घटना भएको आफुले जानकारी पाएको बताए । सो घटनाको जानकारी पाउने बित्तिकै आफन्तहरु घटनास्थल तर्फ लागेको उनले बताए । घटनाको जानकारी पाउने वित्तिकै फत्तेपुर र थपुवा गाउँ शोकमा डुवेको छ ।