खोज

बुटवल,२७ चैत । आउंदै गरेको नयां वर्ष २०८१ सालमा उद्योग व्यवसाय क्षेत्रमा सुधार हुने आशा व्यवसायीहरुले व्यक्त गरेका छन् । उद्योग ब्यापार संघ बुटवलले नयां वर्ष २०८१ का सन्दर्भमा आयोजना गरेको शुभकामना आदान प्रदान कार्यक्रममा व्यवसायीहरुले २०८० साल उद्योगी व्यवसायीका लागि सन्तोषजनक हुन नसकेपनि २०८१ मा राम्र्रो हुने आशा व्यक्त गरेका छन् ।

कार्यक्रममा नेपाल उद्योग ब्यापार महासंघका महासचिव खिमनारायण पराजुलीले महासंघ सहित निजी क्षेत्रको दवावको कारण बैंक ब्याज दर एक अंकमा झर्ने प्रकृया शुरु भएको र अन्य आर्थिक सुचकहरु पनि सुधारको दिशामा रहेकाले निराश नहुन आग्रह गरे ।

उनले महासंघले २०८१ सालमा सातै प्रदेशमा जिल्ला तहसम्म शाखा विस्तार र व्यवसायीका हक हितका पक्षमा देशव्यापी अभियान चलाउने बताए ।
संघका सल्लाहकार ज्योति भण्डारीले २०८१ मा संघले आफ्नो सचिवालय भवन निर्माण र सदस्यता बृद्धि, संस्थागत स्तर वृद्धि र सामूहिक लगानीमा उद्योग वा व्यवसाय सञ्चालन गर्नेतर्फ ध्यान केन्द्रीत गर्नुपर्ने बताए ।

कार्यक्रममा अध्यक्ष विष्णुप्रसाद पाण्डेले विगतबाट शिक्षा लिएर उद्योग व्यवसायलाई थप सुधार गर्दै अघि बढ्न सके राम्रो हुने बताए । उनले संघले पाल्पामा गरेको कार्यशालाबाट तय गरेका वार्षिक कार्ययोजनालाई कार्यान्वयन गर्न सबै पदाधिकारी र सदस्यहरुको ध्यान जानुपर्ने बताए ।

कार्यक्रममा नेपाल उद्योग ब्यापार महासंघका लुम्बिनी प्रदेश उपमहासचिव खिमानन्द पौडेल,संघका वरिष्ठ उपाध्यक्ष लोकनाथ पन्थी, उद्योग उपाध्यक्ष पदम जिसी,बाणिज्य उपाध्यक्ष केशव श्रीस, महासचिव यमलाल मरासिनी, सचिव कोशलराज भण्डारी, क्यालेण्डर प्रकाशन समिति संयोजक कृष्णप्रसाद भुसाल, कानुनी सल्लाहकार दामोदर घिमिरे तथा कार्यसमिति सदस्यहरुले शुभकामना व्यक्त गरेका थिए । सो अवसरमा संघले प्रकाशन गरेको भित्तेपात्रो विमोचन गरिएको थियो ।