खोज

बुटवल, २७ चैत । पाल्पाको तिनाउ गाउंपालिका– ३ बसन्तपुरस्थित कामाख्या देवी मन्दिरमा मानव कल्याण, जीव कल्याण र विश्व शान्तिको कामना सहित वैदिक सनातन संस्कार र संस्कृती संरक्षणार्थ सन्ध्या महाआरती शुरु भएको छ ।
लुम्बिनी केबलकारको माथिल्लो स्टेशन बसन्तपुरमा रहेको कामाख्या देवीको मन्दिर र सय वर्ष अघि देखि पुजा आजा हुंदै आएको दुर्गा माता मन्दिर परिसरमा मंगलबार सांझदेखि महाआरती शुरु भएको हो । चैत २७ देखि बैशाख ५ गते रामनवमि सम्म हरेक दिन सांझ ६.१५ देखि सांझ ७.१५ बजेसम्म यो सन्ध्या महाआरति संचालन हुने महाआरती कार्यक्रम संयोजक पण्डित प्रकाश तिवारीले बताए ।

महाआरती शुभारम्भ कार्यक्रममा लुम्बिनी केबलकारका परिकल्पनाकार एवं संस्थापक सदस्य लक्ष्मण गौतम, अपरेसन म्यानेजर डिएन कायस्थ सैंजू, म्यानेजर प्रज्ज्वल घिमिरे, विभागीय प्रमुख राजन लम्साल, कामाख्या मन्दिरका पुजारी सुरेश शर्मा लगायतले कामाख्या मन्दिर नेपालमा एक मात्र मन्दिर तथा दुर्गा माताको मन्दिर पनि सय वर्ष इतिहास भएको ऐतिहासिक भएकाले बसन्तपुरलाई पर्यटकीय संगै धार्मिक आस्थाको केन्द्र बनाउन महाआरती कार्यक्रमले टेवा पुग्ने बताए । बसन्तपुर क्षेत्र परापूर्वकालमा ऋषिमुनीहरुको तप, ध्यान र साधना स्थल भएपनि ओझेलमा परेकोमा लुम्बिनी केबलकार सञ्चालनमा आएपछि यसको महत्व विस्तारै उजागर हुन थालेको आध्यात्मिक अगुवा समेत रहेका लक्ष्मण गौतमले बताए । लुम्बिनी केबलकारमा यात्रा गर्दा १२ मिनेटमा पुगिने बसन्तपुर
समुद्री सतहबाट झण्डै १ हजार मिटर उचाईमा छ । प्राकृतिक रुपमा स्वच्छ, शान्त, रमणीय हिल स्टेशनको रुपमा रहेको बशन्तपुर लुम्बिनी प्रदेशको प्रमुख पर्यटकीय स्थलको रुपमा विकास हुंदै गएको छ ।