खोज

बुटवल,२० चैत । त्रिभुवन विश्वविद्यालयको रेक्टर र रजिष्ट्रार नियुक्तिमा भइरहेको दलीय राजनीतिक हस्तक्षेपको विरोध गर्दै नेत्रविक्रम चन्द विप्लव नेतृत्वको विद्यार्थी संगठनले बुटवलमा प्रदर्शन गरेको छ । अखिल नेपाल विद्यार्थी युनियन समाजवादीको अगुवाईमा बुटवल वहुमुखी क्याम्पसदेखि गोलपार्कसम्म विरोध प्रदर्शन भएको हो ।
विरोध प्रदर्शनका सहभागीहरुले ‘रजिष्ट्रार नियुक्तिमा राजनीतिक हस्तक्षेप बन्द गर’, ‘खुला प्रतिष्पर्धाबाट नियुक्ति गर’, ‘समाजवादी शिक्षा नीति लागु गर’, ‘प्रश्नपत्र अंग्रेजी र नेपाली दुबै माध्यममा तयार गर’,‘उत्तर पुस्तिका हराउनेमाथि कारवाही गर’,‘परीक्षाको नतिजा समयमै प्रकाशित गर’, ‘एमसीसी खारेज गर’ लगायतका नारा लेखिएका प्लेकार्ड प्रदर्शन गरेका थिए ।
प्रदर्शनपछि भएको कोणसभामा बोल्दै अखिल नेपाल विद्यार्थी युनियन समाजवादीका केन्द्रीय सदस्य विज्ञान सीले हालका उपकुलपति प्रा.डा. केशरजंग बराले रेक्टर र रजिष्ट्रार नियुक्तिका लागि सिफारिश गरेका व्यक्तिलाई रोकेर दलीय भागवण्डामा नियुक्त गर्न चलखेल गर्नु आपत्तिजनक भएको बताए ।
उपकुलपतिलाई स्वतन्त्र ढंगले काम गर्न नदिई राजनीतिक हस्तक्षेप गरेर राजीनामा दिन वाध्य पार्ने गरी प्रधानमन्त्री, एमाले अध्यक्ष र शिक्षामन्त्रीले नाजायज भूमिका खेलेको हुंदा विद्यार्थीहरु आन्दोलनमा उत्रिनुपरेको उनले बताए । उनले आफ्नो संगठनले त्रिविमा भइरहेको राजनीतिक भागवण्डा र हस्तक्षेपविरुद्ध चरणवद्ध आन्दोलन गर्ने बताए ।

त्रिभुवन विश्वविद्यालय २०८० पुस १२ गतेदेखि रजिस्ट्रारविहीन छ । रजिस्ट्रार पेशल दाहालको कार्यकाल पूरा भएपछि सरकारले हाललाई डा. कृष्णप्रसाद बस्याललाई निमित्त रजिस्ट्रार तोकेको छ ।
त्रिविका उपकुलपतिले रजिस्ट्रार र रेक्टर पद रिक्त भएपछि चैत ६ गते सूचना जारी गर्दै ७ दिनभित्र बायोडाटा बुझाउन आवेदन माग गरेका थिए । सोहीअनुसार उपकुलपति प्राडा केशरजंग बरालले चैत १५ मा रेक्टरमा प्रा.डा. खड्ग केसी र रजिस्ट्रारमा प्रा.डा. केदार रिजालको नाम त्रिविका कुलपति एवं प्रधानमन्त्री पुष्पकमल दाहाल ‘प्रचण्ड’समक्ष सिफारिस गरेका थिए । तर प्रधानमन्त्रीले हालसम्म रोकेका कारण नियुक्ति प्रकृया अघि बढेको छैन । नेकपा एमालेका अध्यक्ष केपी शर्मा ओलीले समेत उक्त सिफारिसमा हस्तक्षेप गरेको आरोप छ । गत शुक्रबार प्रधानमन्त्री दाहाल, ओली तथा शिक्षा, विज्ञान तथा प्रविधिमन्त्री सुमना श्रेष्ठ र उपकुलपति बरालबीच बालुवाटारमा छलफल भएको थियो । छलफलमा एमाले अध्यक्ष ओलीले प्रगतिशील प्राध्यापक संगठनका अध्यक्ष प्रा.डा. वेदराज केसीलाई रजिस्ट्रार नियुक्त गर्नुपर्ने अडान लिएका थिए ।
त्यसपछि प्रधानमन्त्री प्रचण्डले नियुक्तिबारे पुनर्विचार गर्न त्रिवि उपकुलपति बराललाई निर्देशन दिएका थिए तर सिफारिस भएकालाई नै नियुक्ति हुनुपर्ने अडान त्रिवि उपकुलपति बरालको छ ।
प्रा.डा. केसीमाथि एमालेको राजनीतिमा सक्रिय रहेको आरोप छ । उनी २०७८ चैत २५ र २६ चैतमा काठमाडौंमा सम्पन्न संगठनको दशौँ राष्ट्रिय सम्मेलनमा नेपाल प्रगतिशील प्राध्यापक संगठनको अध्यक्षमा निर्वाचित भएका थिए । उपकुलपति बरालले भने खुला प्रतिस्पर्धाबाट योग्य व्यक्ति नियुक्त हुनुपर्ने माग गर्दै आएका छन् । उनले आफ्नो टिम बनाउन अधिकार पाउनुपर्ने पनि बताएका छन् ।