खोज

बुटवल, १९ चैत ।

लुम्बिनी प्रदेशका तत्कालीन भूमि व्यवस्था कृषि तथा सहकारी मन्त्रालयका सचिव बैकुण्ठ अधिकारीसहित तीन जनाले भ्रष्टाचार मुद्दामा सफाई पाएका छन् ।

आर्थिक वर्ष २०७५÷०७६ मा विभिन्न कृषि समूह, सहकारी र संस्थामार्फत् कम क्षमता र गुणस्तरका उपकरण वितरण गरी अनुदान हिनामिना गरेको भन्दै अख्तियारले अधिकारीसहित ४ जनाविरुद्ध भ्रष्टाचार मुद्दा दायर दायर गरेको थियो ।

उक्त मुद्दाको अन्तिम सुनुवाई गर्दै विशेष अदालतले सोमबार फैसला सुनाएको हो । विशेष अदालतका न्यायधीशहरु खुशीप्रसाद थारु रामबहादुर थापा र मुरारीबाबु श्रेष्ठको संयुक्त इजलाशले प्रतिवादीहरु वैकुण्ठ अधिकारी, कृषि व्यवस्था, कृषि सहकारी मन्त्रालयका महाशाखा प्रमुख श्रीधर ज्ञवाली, कृषि प्रसार अधिकृत मुकेश राम्जाली नेपालीलाई सफाई दिएको हो ।

त्यस्तै अर्का प्रतिवादी आधुनिक कृषि किसान संसार र सो संस्थाका प्रबन्ध निर्देशक राजाराम तिवारीलाई भने अदालतले दोषी ठहर गर्दै ५ लाख ८१ हजार २५० रुपियाँ बिगो र बिगो बराबरकै जरिवानाको फैसला सुनाएको छ ।

अख्तियारले गरेको अनुसन्धानमा सम्झौताविपरीत कम क्षमता र गुणस्तरको कृषि यान्त्रिक उपकरण वितरण गरेको पाइएको तथा सोही कार्यमा बद्नियत देखिएको ठहर गरेको थियो । सो काममा एक करोड ३१ लाख ६० हजार रुपैयाँ बराबरको भ्रष्टाचार भएको अख्तियारले दावी गरेको थियो । उनीहरुविरुद्ध अख्तियारले एक करोड ३१ लख ६० हजार रुपैयाँ बराबरको बिगो र कैद सजायको माग गर्दै मुद्दा दायर गरेको थियो ।