खोज

बर्दघाट, ११ चैत । पश्चिम नवलपरासी क्षेत्र नं.२ का प्रतिनिधि सभा सदस्य एवं पूर्वमन्त्री ध्रुबबहादुर प्रधानले प्रसिद्ध धार्मिक स्थल त्रिवेणीधाम र मदारबाबालाई लुम्बिनी प्रदेशमा ल्याउन आन्दोलनको तयारी भईरहेको बताएका छन । सञ्चारकर्मीसँग कुराकानी गर्दै सांसद प्रधानले यी दुवै तीर्थस्थल गण्डकी प्रदेशमा हुँदा पश्चिम नवलपरासीको विकासमा समेत असर पुगेको दाबी गरे । संविधान निर्माणको क्रममा साविक नवलपरासी जिल्ला टुक्रिएपछि त्रिवेणीधाम र मदारबाबाको समाधीस्थल गण्डकी प्रदेशको पूर्वी नवलपरासी जिल्लामा समावेश गरिएपछि यी दुवै पवित्र तीर्थस्थल गुमाउँदा पश्चिम नवलपरासी जिल्ला विकासमा पछि परेको सांसद प्रधानको भनाई थियो ।

पश्चिम नवलपरासीका सबै राजनीतिक दल, नागरिक समाज तथा आम नागरिक मिलेर त्रिवेणी र मदारबाबा फिर्ता ल्याउन आन्दोलन गर्नुको विकल्प नभएको प्रधानले बताए । यसका लागि केही समयमै बृहत आन्दोलन शुरु गरिने उनले बताए । त्रिवेणी क्षेत्र गण्डकी प्रदेशमा हुँदा त्यहाँका स्थानीय वासिन्दालाई समेत असहजता छ । आफ्नै पालिका र सदरमुकाम पुग्न घण्टौँ यात्रा गर्नुपर्ने बाध्यता स्थानीयलाई छ । त्रिवेणीधाम यस क्षेत्रको महत्वपूर्ण धार्मिक तथा पर्यटकीय स्थल हो ।

यहाँ दैनिक एक हजार बढी आन्तरिक तथा बाह्य पर्यटक आउने गर्दछन् यस्तै मदारबाबा पनि हिन्दु र ईस्लाम धर्मावलम्बीहरुको आस्थाको केन्द्र हो । बर्दघाटबाट २१ किलोमिटर पूर्वमा रहेको यो स्थलमा हिन्दुको शिवरात्री शुरु हुनु भन्दा एक हप्ताअघि देखि ठूलो मेला लाग्ने गर्दछ, जहाँ नेपाल र भारतका लाखौँ भक्तजनहरु पुग्ने गर्दछन् । यो स्थल मुस्लिम समुदायको लागि नेपालकै ठूलो र ऐतिहासिक स्थल हो ।