खोज

बुटवल,९ चैत ।   बुटवल देवीनगरमा प्रधान कार्यालय रहेको बोर्ड टांगेको एक ब्यापारिक संस्थाले आफ्नना मार्केटिङ कर्मचारीमाथि ज्यादती गरेको पाइएको छ । गड वेल इन्टरनेसनल अर्गनाइजेसन नामको संस्थाका कर्मचारीले कम्पनीका सामान कमिसनमा बेच्ने एक युवतीको मोबाइल कब्जा गर्ने,घरमा फोन गर्न नदिने, घर जान नदिने जस्ता ज्यादती गरेको भेटिएको हो । कपिलवस्तुको मायादेवी गाउपालिका ८ बरपुलकी उमा बरईलाई पटक पटक घर जान्छु भन्दा जान नदिई कम्पनीकी कर्मचारी पुजन विकले मोबाइल समेत कब्जा गरेर गालीगलौज गरेपछि ती युवती पीडा खप्न नसकेर बिहीबार रुंदै देवीनगर प्रहरी चौकीमा पुगेकी थिइन् ।

चौकीमा प्रहरीले रात परिसकेकाले उमालाई एक्लै कतै जान नदिन कम्पनीका कर्मचारीलाई सम्झाउंदै पठाएको थियो । तर केहीबेरमै कम्पनीका कर्मचारीले उमालाई इटाभटीको दिब्रुङ शान्तिपुरे होटेलमा बास बस्न पुराएका थिए । त्यहां बस्न र खानका लागि पैसा समेत नदिई अलपत्र पारेपछि त्यो सूचना नेत्रविक्रम चन्द विप्लव नेतृत्वको नेकपाको युवा संघ नेपालमा पुग्यो ।

त्यसपछि पार्टी सेक्रेटरी विरेन्द्र सी, युवा संघका रुपन्देही कोषाध्यक्ष चन्द्र बहादुर सी,महेन्द्र सी लगायतले उमालाई होटलबाट उद्धार गरी पुनः प्रहरी चौकीमा ल्याई थप अनुसन्धान गर्न दवाव दिएको थियो । उक्त कम्पनीले महिला कर्मचारीमाथि ज्यादतीपूर्ण व्यवहार गरेको र छात्राबासको नाममा महिला र पुरुषलाई एउटै हलमा राख्ने गरेको, अरु कर्मचारीका ७–८ वटा मोबाइलहरु पनि कर्मचारीले कब्जामा लिएको पत्ता लगाएपछि उक्त संस्थाको गतिविधि शंकास्पद भन्दै राम्रोसंग अनुसन्धान र छानवीन गर्न माग गरेको युवा संघका कोषाध्यक्ष चन्द्र बहादुरले बताए ।

अरु कर्मचारीले उमाले जस्तै ज्यादती भोग्न नपरोस् भनेर उक्त संस्थामाथि छानवीनको माग गरेको उनले बताए । उक्त संस्थामा १० जना भन्दा बढीले राइटिङ ट्याब,म्याजिक पेन्सील,अलार्म लक लगायतका सामान बेच्ने र विक्रिका आधारमा कमिसन पाउने गर्दथे । कम्पनीले त्यसरी सामान बेच्नेलाई कमिसन वाहेक तलब र अरु कुनै सुविधान नदिई भविष्य राम्रो छ, पछि म्यानेजर बन्न पाइन्छ, एक लाख सम्म तलब हुन्छ भन्दै झुठा आश्वासन र प्रलोभन देखाउने गरेको पाइएको नेकपा रुपन्देही सेक्रेटरी वीरेन्द्रले बताए ।

पछिल्लो समय आफूहरुले समाजमा हुने ज्यादती, अनियमितता र सामाजिक इस्युमा पीडितको पक्षमा निस्वार्थ ढंगले काम गर्दै आएकाले अन्यायमा पर्नेहरु पार्टीको सम्पर्कमा आउने क्रम बढेको बताए । उक्त संस्थाको मुख्य संचालक राजेश खड्का थाइल्याण्डमा रहेको भन्दै कर्मचारी दीपा श्रेष्ठले संस्थाले सामान बेच्नेहरुमाथि ज्यादती नगरेको दावी गरिन् ।