खोज

न्युज बुटवल टुडे
कपिलवस्तु, ९ चैत

कपिलवस्तुको तौलिहवामा सम्पन्न नगरस्तरीय स्मृति कप क्रिकेटको उपाधि कपिलवस्तु नगरपालिका वडा नम्बर २ ले जितेको छ । वडा नम्बर १ लाई १० रनले पराजित गर्दै २ ले उपाधि जित्न सफल भएको हो ।

टस हारेर पहिले ब्याटिङ्ग गरेको वडा नम्बर २ ले २० ओभरमा अलआउट हँुदै १ सय ५ रन जोडेको थियो । वडा नम्बर २ का शिव कुमार मौर्यले सर्वाधिक २६ रन र सरफुद्दिन मुसलमानले १६ रन जोडेका थिए । त्यसैगरी बलिङ्ग तर्फ दिपक डफाली र सतेन्द्र पाण्डेयले समान २÷२ विकेट लिएका थिए । दोस्रो ईनिङ्गमा ब्याटिङ्ग गरेको वडा नम्बर १ ले निर्धारित २० ओभरमा ८ विकेट गुमाउँदै ९५ रन मात्रै जोड्न सफल भएको थियो । वडा नम्बर १ का खेलाडी राज अग्रहरीले सर्वाधिक २९ रन बनाएका थिए भने वडा नम्बर २ का रामनिवास यादवले ४ विकेट लिएका थिए । संघका दिवंगत पुर्व पदाधिकारी र क्रिकेट खेलाडीको सम्झनामा कपिलवस्तु क्रिकेट संघको आयोजनामा चैत ५ गते तौलिहवामा नगरस्तरीय स्मृती कप क्रिकेट प्रतियोगिता शुरु भएको थियो ।

बुद्धपद्धम माध्यमिक विद्यालयको खेल मैदानमा दुई समूहमा लिग क्रिकेट प्रतियोगिता गरिएको थियो । उपाधिसँगै वडा नम्बर २ ले नगद ३० हजार, शिल्ड र प्रमाणपत्र तथा वडा नम्बर १ ले नगद १५ हजार सहित शिल्ड र प्रमाणपत्र प्राप्त गरेका छन् । संघका जिल्ला अध्यक्ष प्रकाश गैरे, लुम्बिनी प्रदेशसभा सदस्य सुधाकर पाण्डेय, कपिलवस्तु नगरपालिकाका प्रमुख सुदिप पौडेल, जिल्ला खेलकुद समितिका अध्यक्ष राजेश उपाध्याय, पुरस्कारका प्रायोजकहरु युवराज भुसाल, अजित वर्मा, संदिप श्रीवास्तव र नगरका जनप्रतिनिधिले पुरस्कार, शिल्ड र प्रमाणपत्र हस्तान्तरण गरे । प्रतियोगितामा वडा नं. २ का शिवकुमार मौर्यले म्यान अफ द सिरिज, वडा नं. १ का रियाज फकिरले बेष्ट ब्याटर र वडा नं. २ का मलिक गद्दिले बेष्ट बलरको पुरस्कार जिते । दिवंगत खेलाडीको सम्मानमा ६ वटा टिमबिच दुई समूहमा नकआउट प्रतियोगिता आयोजना गरिएको कपिलवस्तु क्रिकेट संघका कोषाध्यक्ष पदमराज श्रेष्ठले जानकारी दिए ।

दिवंगत खेलाडीको सम्झनामा संघले आयोजना गरेको प्रतियोगिता उदाहरणीय रहेको कपिलवस्तु नगरपालिकाका प्रमुख सुदिप पौडेलले बताए । संघले आयोजना गरेको प्रतियोगिताका कारण नयाँ प्रतिभावान खेलाडी उजागर भएकाले अब संघले गाउँ गाउँ सम्म प्रतियोगिता आयोजना गर्न सुझाव दिंदै नगरले खेल आयोजनामा आवश्यक सहयोग गर्ने पौडेलले प्रतिबद्धता जनाए । दिवंगत खेलाडीको सम्झनामा खेल आयोजना गरिनु सह्रानीय भएको लुम्बिनी प्रदेशसभाका सदस्य सुधाकर पाण्डेयले बताए ।

खेलका कारण प्रतिभावान खेलाडीले अवसर पाएकोमा पाण्डेयले खुसी व्यक्त गरे । सो अवसरमा बोल्दै बिगतमा जिल्लाको क्रिकेट खेलमा योगदान पुर्याएका दिवंगत पदाधिकारी र खेलाडीको सम्झनामा आयोजित खेललाई भविष्यमा निरन्तरता दिईने कपिलवस्तु क्रिकेट संघका अध्यक्ष प्रकाश गैरेले प्रतिबद्धता जनाए । प्रतियोगिता दिवंगत पुर्व पदाधिकारी बनारसीलाल वर्मा, दिवंगत खेलाडीहरु राजेन्द्र प्रताप शाक्य, दिपेन्द्र सिंह रावल, विजय शर्मा, धिरेन्द्र सिंह, कमल राना, रंजित अग्रहरी, रत्नेश गुप्ता, खगेन्द्र कार्की र श्रवण गुप्ताको सम्झनामा आयोजना भएको थियो ।