खोज

बुटवल, ८ चैत ।

नेपालकै ठुलो यातायात व्यवसायीहरुको संस्था पश्चिम नेपाल बस ब्यबसायी प्रा.लि.बुटवलको चौथो बार्षिक साधारण सभा तथा दोश्रो अधिबेशन आगामी १६ र १७ गते बुटवलमा सम्पन्न हुने भएको छ । बि.सं २०२६ सालमा स्थापना भएको भएपनि प्रालिमा रुपान्तरित भएका कारण पश्चिम नेपाल बस ब्यबसायी प्रा.लि.बुटवलको चौथो बार्षिक साधारण सभा तथा दोश्रो अधिवेशन हुने भएको हो ।

हाल कुल २२ सय शेयर सदस्य रहेको तथा कम्पनी ऐन २०६४ अनुसार पश्चिम नेपाल बस ब्यवसायी संघबाट रुपान्तरित प्रा.लि.को हालै बसेको बैठकले अधिबेशन तथा साधारण सभा सम्बन्धी निर्णय गरेको अध्यक्ष दधिराम खरेलले बताए । अध्यक्ष खरेलका अनुसार बिगतमा पश्चिम नेपाल यातायात समिति, बस ब्यबसायी संघहुँदै प्रा.लिमा रुपान्तरित पश्चिम नेपाल बस ब्यबसायी प्रालिको चौथो वार्षिक साधारण सभा तथा दोश्रो अधिवेशनको तयारी अन्तिम चरण पुगेको छ ।

बुटवलस्थित अन्तर्राष्ट्रिय सम्मेलन केन्द्रमा सम्पन्न हुने सो साधारण सभा तथा अधिवेशनको आवश्यक तयारी भैरहेको प्रालिका प्रबन्ध सन्चालक रामचन्द्र भुसालले जानकारी गराएका छन् । नेपालका नयाँशहर निर्माण, मुलुकको समृद्धि र बिकासमा यातायात क्षेत्रको भुमिका महत्वपुर्ण रहेको दावी भुसालको छ ।

प्रबन्ध संचालक भुसालका अनुसार पछिल्लो समय बिशेष रुपमा ब्यासायिक हकहित, सवारी ब्यवस्थापन र दुर्घटना न्यूनिकरणमा टेवा पुर्याउने उद्देश्यले बिभिन्न नीतिगत, बिधिगत र सचेतनामूलक कार्यक्रमहरु संचालन गर्दै आईरहेको पश्चिम नेपाल बस ब्यबसायी प्रा.लि.को सो अधिवेशनले आगामी ३ बर्षका लागि नयाँ संचालक समिति चयन गर्ने छ । प्रालिले सार्वजनिक यातायात सेवालाई थप ब्यबस्थित र मर्यादित बनाउने कुरामा जोड दिईरहेको प्रालिका संचालक तथा लेखा संयोजक मोहन पिएसले बताएका छन् ।

प्रालिका संचालक एवं सवारी ब्यवस्थापन तथा दुर्घटना न्यूनिकरण समितिका संयोजक नारायण घिमिरेका अनुसार बिसं २०२६ सालमा पश्चिम नेपाल यातायात समितिको नाममा स्थापना भएको भएको सो पश्चिम नेपाल बस ब्यबसायी संघहुँदै आर्थिक बर्ष २०७५÷०७६ मा प्रालिमा रुपान्तरित भएको थियो ।

स्थापना कालदेखि नै ब्यावसायिक हकहित संरक्षणमा जोड दिँदै आएको प्रालिले विभिन्न समयमा उत्कृष्ट ब्यवसायी, लामो समयदेखि दुर्घटना नगरी सुरक्षित यात्रा गराउने उत्कृष्ट चालकहरु र संचार क्षेत्रबाट यातायातको क्षेत्रमा सहयोग पुर्याउने पत्रकार लगायतलाई पुरस्कृत एवं सम्मान प्रदान गर्दै आइरहेको संचालक घिमिरेको भनाई छ ।