खोज

सुनवल, ५ चैत

पश्चिम नवलपरासी प्रहरीले घटना घटेको एक महिनापछि सुस्ता गाउंपालिका ३ मर्चहवामा हजुरबुवा र नातिको हत्यामा संलग्न दुई युवालाई पक्राउ गरी सार्वजनिक गरेको छ ।

हत्यामा स्थानीय २९ वर्षीय अजय धरिकार र २० वर्षका चन्दन हरिजनको संलग्नता रहेको प्रहरीले आइतबार पत्रकार सम्मेलन गरी सार्वजनिक गरेको हो । गत फागुन १ गते ६५ वर्षका हजुरबुवा यक्षलाल चमार र ११ वर्षका नाति गौचरण चमारको धारिलो हतियार प्रयोग गरेर विभत्स हत्या भएको थियो ।

अनुसन्धानको क्रममा उनीहरुले छिमेकीसँगको रिस पोख्ने क्रममा दुई जनाको हत्या गरेको बयान दिएको जिल्ला प्रहरी कार्यालयका प्रहरी उपरिक्षक काजिकुमार आचार्यले जानकारी दिए । छिमेकी अन्य व्यक्तिसंग झगडा भएको तर उक्त व्यक्ति माथि आक्रमण गर्ने उद्देश्यले कुरेर बसेपनि ती व्यक्ति नआएपछि, उसैलाई फसाउने उद्देश्यले हत्या गरेको अनुसन्धानबाट खुलेको प्रहरीले जनाएको छ ।

‘हत्यामा संलग्न भनिएका युवाहरुको छिमेकीसँग समान्य विवाद भएको र उक्त विवाद प्रहरीमा मिलापत्र समेत भइसकेको अवस्थामा बदला लिने उद्देश्यले चन्दन ले साथी अजयको सहयोग लिएर हत्या गरेको खुलेको छ, प्रहरी उपरीक्षक आचार्यले भने ।’ उनीहरुले झगडा भएका छिमेकीलाई हत्या गर्न कुरेर बसेपनि, ति व्यक्ति नआएपछि उसैमाथि प्रहरीले शंका गर्न सक्ने आँकलन गरेर नजिकै बस्ने हजुरवुवा र नातीको हत्या गरी गाँउमै बसेका थिए ।

नारायणी नदी किनारमा एकान्त स्थानमा रहेको घरमा भएको हत्याका क्रममा संलग्न भएका दुई जना युवाले मादक पदार्थ र लागुऔषधको सेवन गरेको पाईएको प्रहरीले जनाएको छ । दुवैजना माथि अदालतबाट सात दिनको म्याद लिई थप अनुसन्धान भईरहेको जिल्ला प्रहरी कार्यालयका प्रहरी प्रहरी नायव उपरीक्षक रेशम बोहोराले जानकारी दिए ।