खोज

गुल्मी, ५ चैत । तोकिएको समयमा काम सम्पन्न नहुँदा गुल्मीका चारवटा पक्की पुलहरूको निर्माण कार्य कछुवा गतिमा अघि बढेको छ । सम्झौता बमोजिम तोकीएको मितिमा पुल निर्माणको काम सम्पन्न नगरि निर्माण व्यवसायीहरूले म्याद थप गर्दै जाँदा पुलको निर्माणको काम भने सुस्त गतिमा अघि बढेको हो । जिल्लाको क्षेत्र नं २ अन्र्तगत हुलाके, धनार्जी, घमिर र फुलबारीमा गरि चारवटा पक्की पुलहरू निर्माणाधिन अबस्थामा छन । जिल्लाको तम्घास–सिमलटारी सडक खण्ड अन्र्तगतका उक्त पक्की पुल समयमै निर्माण कार्य नहुँदा नागरिकले वषौंदेखि सास्ती खेप्दै आईरहेका छन् ।

सडक कालोपत्रे भएको चार वर्ष बितिसक्दा पनि खोलामा पक्की पुल नबनेका कारण यात्रुले वर्षौदेखि सास्ती खेप्दै आउन बाध्य छन । तम्घास‐सिमलटारी सडक खण्ड अन्र्तगत हुलाके, धनार्जी, फूलबारी र घमिरका खोलामा पुल नहुँदा वर्षादको समयमा सवारी साधान र पैदल यात्रुले समस्या भोग्दै आएका छन । तम्घास सिमलटारी सडक खण्डका चार स्थानका पुल नबन्दा वर्षातको समयमा सामान्य पानी पर्दा सर्वसाधारण र सवारी चालक समेत बाटोमै रोकिनुपर्ने बाध्यता छ । यी खोलामा आउने बाढीले कैयौं पटक सवारी साधनहरू समेत बगाउने गरेको छ ।
संघीय सरकारको सहयोगमा धनार्जीमा ७ करोड ४८ हजार र हुलाके खोलामा ५ करोड ७९ लाख ५३ हजारको लागतमा पुलको निर्माण शुरु गरिएको हो । त्यसैगरी घमिर खोलामा पुल निर्माणको लागि ३ करोड १३ लाख ८४ हजार र फुलवारी खोलामा ३ करोड ३२ लाख ६८ हजार लागतमा पुलको निर्माण कार्य भैरहेको छ ।

जिल्लाको क्षेत्र नम्बर–२ अन्तर्गत मदन भण्डारी राजमार्ग अन्र्तगत तम्घास–सिमलटारी, पुर्कोटहुँदै प्यूठानसम्म जोडने उक्त सडकमा १९ करोड भन्दा बढी लागतमा चार वटा पुलहरू निर्माणाधिन अबस्था छन । पुल निर्माणको लागि घमिर र फुलबारीमा पन्त निर्माण सेवा र हुलाके र धनार्जी खोलामा सुनिल समीर निर्माण सेवा प्रालीले निर्माणको जिम्मा लिएका छन । बर्षादको समय नजिकिंदै गर्दा पुलको निर्माण कार्यमा ढिलाइ भएको भन्दै गुल्मी क्षेत्र नं २ मा सांसद गोकर्ण बिष्टको नेतृत्वमा निर्माणधिन पुलको निरिक्षण तथा अनुगमन गरिएको छ । निर्माण व्यवसायीले निर्माणको जिम्मा लिएर पनि समयमै काम सम्पन्न नगरेको भन्दै सांसद बिष्ट सहित कार्यालय र सरोकारवाला टोलीले स्थलगत रूपमा निरीक्षण गरेको हो । निरिक्षणको क्रममा कुनै ठाउँमा ६५ प्रतिसत काम सम्पन्न भएको छ भने कुनै ठाउँमा ३० प्रतिशत मात्र कामको प्रगति देखिएको संसद बिष्टले जानकारी लिएका थिए । निरिक्षण तथा अनुगमनको क्रममा हुलाके खोला र धनार्जी खोलामा निर्माण हुन लागेको पुलको काम सुस्त गतिमा भइरहेको पाइएको छ । त्यस्तै फुलबारी र घमिर खोलामा भने निर्माणको काम अन्तिम चरणमा पुग्न लागेको बताईएको छ ।

सांसद गोकर्ण बिष्ट सहित जिल्ला समन्वय समितिका प्रमुख द्रोणबहादुर खत्री, प्रमुख जिल्ला अधिकारी कृष्णप्रसाद शर्मा, मदन भण्डारी राजमार्ग आयोजना कार्यालयका प्रमुख इन्जिनियर युवराज पोखरेल सहित सुरक्षा निकाय, सञ्चारकर्मीहरू सहितको टोलीले चारवटै पुलको अनुगमन तथा निरिक्षण गरेको हो । अनुगमनको क्रममा आउदो बैशाख महिना भित्रै काम सम्पन्न गर्ने तयारी भइरहेको निर्माण व्यवसायीले प्रतिबद्धता जनाएका छन ।मदन भण्डारी राजमार्ग आयोजना कार्यालयका प्रमुख इन्जिनियर युवराज पोखरेलले रकमको अभावमा काम अलपत्र नपर्ने भन्दै आउँदो असारसम्म चारवटै पुलको निर्माण सम्पन्न गर्ने गरि द्रुत गतिमा काम गर्न निर्माण व्यवसायीलाई आग्रह गरेका छन ।अनुगमनको क्रममा सांसद बिष्टले निर्माणको क्रममा बजेटको अभावदेखि कुनै प्रकारका समस्या आएमा आफुले त्यसको समाधान गर्न पहल गर्ने भन्दै निर्माण व्यवसायीहरू पनि कुनै बाहाना बनाएर कामवाट उम्कन नपाईने बताए । निर्माण व्यवसायी बाबुराम थापाले कार्यालयले समयमै काम गरेको भुक्तानी दिनेहो भने आफुहरूले समयमै काम सम्पन्न गर्ने बताउछन । सम्झौता अनुसार निर्माण व्यवसायीले चार वटै पुल १८ देखि २० महिनाभित्र सम्पन्न गर्नु पर्ने थियो तर थपिएको म्यादमा पनि काम सम्पन्न हुने अवस्था नदेखिएपछि यतिबेला आयोजना कार्यालय र निर्माण व्यवसायीलाई समेत कामको दवाब पर्न थालेको छ ।