खोज

बुटवल, ४ चैत । विगतमा चलचित्र रमाईलोका लागि हेर्ने चलन थियो । चलचित्रमा देखाईने पात्रको भूमिका भन्दा पनि उनीहरूको अनुहारका कारण हल सम्म पुग्ने दर्शकको संख्या धेरै हुने गर्दथ्यो । लामो अन्तरालमा बन्ने नेपाली चलचित्रलाई माया गर्ने दर्शकको विगतमा पनि कम साथ थिएन । त्योसँगै हिन्दी चलचित्रको दबदबा अत्यन्त थियो ।

समयले कोल्टो फेरे जस्तै नेपाली चलचित्रले पनि आफ्नो लय फेरेको देखिन्छ । माया प्रेममा मात्रै बन्ने चलचित्रहरूले पनि सामाजिक परिवेशलाई बलियो रूपमा प्रस्तुत गरिरहेको देख्न सकिन्छ । यही फाुगन २५ गतेबाट देशभरि प्रदर्शन भईरहेको चलचित्र उपहारले पनि पछिल्लो समयमा घटिरहेकामा समाजको बास्तविकतालाई देखाएको छ । चर्चित अभिनेत्री रेखा थापाले निर्माण गरेको पछिल्लो चलचित्र हो उपहार । यो चलचित्रबाट मनोरञ्जनसँगै समाजको बास्तविकतालाई पनि देखाउन खोजिएको छ । चलचित्र हेरिरहँदा सम्म दर्शकले झुर महसुस गर्देनन् । पछिल्लो पुस्ताले भोगेका भोगाईलाई कला मार्फत देखाउन सक्नु चलचित्रको बलियो पक्ष मानिएको छ ।

यो चलचित्रबाट महिला पात्रले पनि चलचित्रलाई सफल बनाउन सक्छन् भन्ने गतिलो उदाहरण पनि देख्न सकिन्छ । विशोष गरी अभिनेत्री रेखा थापाले गरेको काम हेर्न लायक छ । उनले महिलाको विशेष अवस्थामा पनि मज्जासँग अभिनय गरेकी छन् । उनको गर्भ अवस्थामा पनि कहिँकतै त्यस्तो भान हुँदैन चलचित्र हेरिरहदा । उनको काम गर्ने जोसमा कतै उनी गर्भवती हुन् भन्ने नै लाग्दैन । यो अवस्थामा धेरै महिलाहरूले आफ्नो नियमित काम गर्न सकिरहेका हँुदैनन । विशोष अवस्था हो भनेर सहानुभुति बटुलिरहेका हुन्छौं । काम गर्ने स्थान, घर परिवार, आफन्त सबै क्षेत्रले गर्भवती अवस्थालाई विशेष अवस्था भनेर अत्यन्त संवेनशील बनिरेहको अवस्थामा पनि अभिनेत्री रेखा थापाले चलचित्रमा कामसँगै गरेको फाईट हेरिरहँदा कता कता मन अत्तालिन पुग्छ । आमा बन्न लागेकी उनलाई कति असजिलो भयो होला त्यो त उनी र आमा बनिसकेकाहरूले मात्रै महसुस गर्न सक्छन् । तर पनि कामलाई पहिलो प्राथमिकतामा राखेकी अभिनेत्री थापाले अभिनयलाई न्याय गरेकी छन् ।
चलचित्रमा काम सानो हुँदैन गर्ने तरिका र दृढ विश्वासले मानिसलाई सफलता तर्फ लैजान्छ भन्ने सन्देश दिएको छ । तर केहि उताव चढावहरू भईरहन्छन् जीवनमा त्यसलाई सहज रूपमा लिन सक्नु ठूलो उपहार हो चलचित्रको ।
सर्घषसँगै मायालाई पनि प्रगाढ रूपमा देखाईएको छ । निस्वार्थ हुने मायामा मानिसले कति सम्म त्याग गर्न सक्छ त्यसलाई पनि चलचित्रको बीचमा घुसाइएको छ ।

संघर्ष, सम्पत्ति र पछिल्लो समयमा पुर्खेयाली सम्पति अरूलाई भाडामा लगाएर भरपुर सम्पति जोडेका साहुहरू र तिनिहरूको मारमा परेका मेहनती हातहरूको अवस्थालाई कलात्मक रूपमा देखाइएको छ । काम गर्ने हातलाई अत्यन्त राम्रोसँग सिर्गानु पनि चलचित्रको बलियो पक्ष हो । त्यस माथि पुजा शर्माको चुलबुली चरित्र, बेनिशा हमालको कालो कोटे चरित्रसँगै घरबेटीसँगको संघर्षले र श्रीमानको चरित्रले पनि दर्शकलाई छोएको देखिन्छ । शिशिर राणाको अभिनयले पछिल्लो समयमा समाजमा बढ्दै गएको विकृतिलाई देखाएको छ । जसका कारण धेरैकोे घरबार बिग्रिएको छ । त्यसलाई देखाउन खोजीएको छ । तर पनि उनको भुमिकालाई दर्शकको साथ देखिन्छ । उनको अभिनयले चलचित्रमा हास्य रस प्रदान गरेको छ । बाँकी पात्रहरूको अभिनयलाई दर्शकले कम नोट गरेका छन् । तर पनि चलचित्रमा मुख्य नायकका रूपमा रेखा थापा सँगै रहेका पुजा शर्मा बेनिसा हमाल र खल पात्रको रूपमा रहेकी सुस्मा कार्कीको अभिनयले चलचित्र हेरिरहदा दर्शकलाई आन्नद बनाएको छ । कलाकार मुकुन भुसालको अभिनय छोटो तर जिवन्त छ आर्थिक अभावले विदेशिन बाध्य युवापुस्ताको प्रतिनिधत्व गरेका भुषालको विदेशबाट फर्किदाको भुमिकामा धेरैले आफनो श्रीमान, दाजु, भाई र छोरको रूप देखेर आँखा भिजाउन बाध्य छन् । चर्चित हास्य कलाकार राजाराम पौडेल, किरन केसी र निर्मल शर्मा अतिथि भुमिकामा देखिएका छन् । चलचित्रलाई ज्ञानेन्द्र देउजाले निर्देशक गरेका हुन् भने रेखा फिल्मस् र कपनगढी सिनेमाको ब्यानरमा निर्माण भएको हो ।

अभिनेत्री थापासँगै पूजा शर्मा, बेनिषा हमाल, मुकुन भुसाल, तेज गिरी, समर्पणजङ्ग कार्की, शिशिर राणा, सुष्मा कार्की, विनोदकुमार पौडेललगायत कलाकारले अभिनय गरेका छन् । चलचित्रमा अन्जु पन्थ, समिक्षा अधिकारी, एलिना चौहान लगायतका पछिल्लो पुस्ताका अत्यन्त चर्चित गायिकाहरूको मिठो स्वरले सुनमा सुगन्ध थपेको छ । समग्रमा चलचित्रले सामाजिक विषयबस्तुलाई उठाउन खोजेको छ । तर धेरै विषयलाई समेट्न खोज्दा चलचित्र जति सहज रूपमा बग्नु पर्ने हो त्यो कम देखिएको छ ।