खोज

सुनवल, ३ चैत ।

प्रेस चौतारी नेपाल पश्चिम नवलपरासीले आयोजना गरेको प्रदेशस्तरीय चौतारीकप व्याड्मिन्टन प्रतियोगिताको उपाधि मेघराज गौतम र राजकुमार रेश्मीको जोडीले हात पारेको छ । शनिबार बिहान परासीमा रहेको कभर्डहलमा भएको प्रतिस्पर्धामा रुपन्देहीका मिलन गाहा र सुन्दर तरामुको जोडीलाई गौतम र रेश्मीको जोडिले २१–१६ र २२–२० को सोझो सेटमा हराएको हो । यसैगरी चौतारी प्रदेश कमिटिको वेनिमाधव बस्याल र गोविन्द घर्ती तथा प्रेम राम्जा र कपिल लामिछानेको जोडीले तृतीय स्थान हासिल गर्दा कपिलवस्तुका सागर पुन र सुर्य चुँदालीको जोडीले सान्त्वना स्थानमा चित्त बुझाएको छ ।

प्रतियोगितामा प्रथम हुने समूहलाई नगद १० हजार सहित मेडल र कप प्रदान गरिएको थियो भने द्वितिय हुने टिमलाई नगद ७ हजार लगायत तृतीय र सान्त्वना स्थान हासिल गर्ने जोडीलाई पनि नगद सहित मेडल र कपले पुरस्कृत गरिएको थियो । पुरस्कार वितरण कार्यक्रममा बोल्दै रामग्राम नगरपालिकाका प्रमुख धनपत यादवले संञ्चारकर्मीलाई पर्यटन प्रवद्र्धन र सम्मृद्धि संग जोड्ने गरी कलम चलाउन आग्रह गरे ।

आफ्नै स्थानमा रहेका पुरातात्विक तथा ऐतिहासिक पर्यटकीय स्थलको चाल नपाएर नेपालीहरु विदेशी कला संस्कृतीको प्रचार गर्ने गरेको टिप्पणी गरे । यादवले रामग्राम स्तुप र पण्डितपुर लगायतका स्थल रामग्रामको गहना भएको उल्लेख गर्दे ती स्थलको प्रवद्र्धनका लागि कलम चलाउन कन्जुस्याँई नगर्न प्रमुख यादवले पत्रकारहरुलाई आग्रह गरे । विकास र सम्मृद्धिको लक्ष्य पूरा गर्न यो दल, त्यो दल भनेर नहुने बताउँदै उनले सबै एक भएर सकारात्मक सोचले अगाडि बढ्नुपर्नेमा जोड दिए ।

कार्यक्रममा बोल्दै लुम्बिनी प्रदेश संञ्चार परिषदका संयोजक मिलन गाहाले जनप्रतिनिधिले मात्र नभई पर्यटन प्रवद्र्धनका कार्यक्रममा सरकारी निकायका कर्मचारीहरुको पनि उस्तै सक्रियता रहनुपर्नेमा जोड दिए ।

पर्यटन प्रवद्र्धनको उद्देश्यले चौतारीले दुई दिने कार्यक्रमको रुपमा नवलपरासीका पर्यटकीय स्थलको विषयमा जानकारी सहितको स्थलगत भ्रमण कार्यक्रम र व्याड्मिन्टन प्रतियोगिता आयोजना गरेको अध्यक्ष मेघराज गौतमले बताए । सो क्रममा शुक्रबार लुम्बिनी प्रदेशका विभिन्न जिल्लाका प्रेस चौतारीमा आवद्ध सञ्चारकर्मीहरु रामग्राम, सरावल र पाल्हीनन्दनका विभिन्न ऐतिहासिक तथा पर्यटकीय स्थलको भ्रमणमा गएका थिए ।