खोज

बुटवल, २ चैत ।

उपप्रधान, भौतिक पुर्वाधार तथा यातायात व्यवस्था मन्त्री रघुवीर महासेठले बुटवल नारायणगढ सडकको सास्ती छिटै हट्ने बताएका छन् ।

रोटरी डिष्ट्रिक ३२९२ नेपाल भुटानको १६ औं डिष्ट्रिक कन्फ्रेन्सको शुक्रबार बुटवलमा उद्घाटन गर्दै मन्त्री महासेठले केही आयोजना समयमा पुरा नहुँदा सबैभन्दा बढी आलोचना सुन्नु परेको भन्दै अब त्यस्ता आलोचनाहरु सुन्नु नपर्ने गरी काम गर्ने बताए ।

“अहिले सम्म देखा परेका बाधा ब्यवधानहरु समेत समाधान भएर बुटवल–नारायणगढ सडक निर्माणको गति तीव्रताका साथ अगाडि बढेको छ, अव रोकिदैन”– महासेठले भने ।

मन्त्री महासेठले लुम्बिनीको मात्र नभएर मुलुककै अर्को महत्वपूर्ण परियोजना सिद्धवावा सुरुङमार्गको काम समेत तीव्र रुपमा अगाडि बढेकोले २०८३ चैत भित्रै सम्पन्न हुने बताए । “सिद्धबाबा सुरुङ्गमार्गको काममा कुनै समस्या छैन र हरसम्भव छिटो काम सम्पन्न हुने बिश्वास दिलाउन चाहन्छु”–उनले भने ।

मन्त्री महासेठले बुटवलदेखि गोरुसिंगे चन्द्रौटा सडकको निर्माणको काम पनि अब छिट्टै नै अगाडि बढ्ने बताउनुभयो । “अहिले बुटवल–गोरुसिंगे चन्द्रौटा सडकको निर्माणको लागि टेण्डर आह्वान भईसकेको छ त्यसको पनि छिट्टै ठेक्का सम्झौता गरी निर्माण कार्य अगाडि बढाउँछौं”, मन्त्री महासेठले भने ।

मन्त्री महासेठले बुटवल–नारायणगढ सडकमा भएको सिकाईले बुटवल–गोरुसिंगे चन्द्रौटा सडकमा त्यस्तो समस्या आउन नदिने बताए । “बुटवल–नारायणगढ सडक निर्माणमा देखिएको समस्याबाट पाठ सिकेर बुटवल–गोरुसिंगे–चन्द्रौटा सडकमा त्यो समस्या दोहोरिन दिने छैनौं”– उनले भने।

मन्त्री महासेठले निर्माण आयोजनाको गुणस्तरमा सम्झौता नहुने गरी अगाडि बढ्ने बताए ।

मन्त्री महासेठले बुटवल–बेलहिया सडक र भैरहवा लुम्विनी सडकमा अलपत्र पारेका पुलहरुको निर्माण सम्पन्न गर्न पनि निर्देशन दिईसकेको बताए । बुटवलबाट पोखरासम्म डवल लेन डेडिकेटेड सडकको निर्माण कार्यलाई यथासम्भव छिटो श्रोत ब्यवस्थापन गरेर अगाडी बढाउने उनले बताए ।

मन्त्री महासेठले नागढुंगा सुरुङ मार्गको ब्रेक थ्रुरु हुने बेला भएको बताए । “सुरुङको दुईतर्फको भाग जोडिन ७ दिन काम गर्नुपर्ने हुन्छ, सुरुङ जोडिनै लाग्दा स्थानीयले बिभिन्न माग राखेर आन्दोलन गरिरहेकोले ढिलाइ भएको छ, स्थानीयका केही मागहरु पुरा भईसकेका छन् भने सम्भव हुने मागहरु छिट्टै नै पहल गरेर पुरा गर्ने छौं”, मन्त्री महासेठले भने ।

मन्त्री महासेठले विश्वशान्तिका अग्रदूत गौतमबुद्धको जन्मभूमि लुम्बिनीमा भईरहेको १६ औं डिष्ट्रिक कन्फ्रेन्सको हुन पुर्ण सफलताको शुभकामना दिए ।

उनले रोटरीले मानवीय सेवा कार्यमा बिश्वभरी नै गरेको सहयोग अनुकरणीय रहेको उल्लेख गर्दै नेपालमा रोटरी क्लव स्थापना भएयता सामाजिक क्षेत्रमा गरेको निरन्तरको सहकार्य र सहयोग निकै प्रशंसनीय रहेको बताए ।

कोभिड १९ को महामारी र भुकम्पको बेला रोटरी डिष्ट्रिक ३२९२ र यसमा आवद्ध क्लवहरुले देखाएको सक्रियता, सहकार्य र आर्थिक सहयोग प्रशंसनीय रहेको उनले बताए ।

मन्त्री महासेठले पछिल्लो १५ वर्षमा भौतिक एवं मानवीय विकासका क्षेत्रमा राम्रा काम भएपनि सरकारले गरेका कतिपय कामहरुको बारेमा जनतामा सही ढंगले सम्प्रेषण गर्न नसक्दा निराशाजस्तो देखिएको बताए ।

उनले सरकार मुलकुको समृद्धीको एकल लक्ष्य लिएर अगाडि बढेको उल्लेख गर्दै सरकारको यो अभियानमा रोटरी क्लव लगायतका अन्तर्राष्ट्रिय स्तरका संस्थाहरुले बिगतमा गरेका सहकार्यहरुलाई अझै बढाउदै लैजान जरुरी रहेको बताए।

तीन दिन सम्म चल्ने रोटरी डिष्ट्रिक कन्फ्रेन्समा डिष्ट्रिक अन्तर्गत १५६ क्लबका १ हजार ७ सय बढी सदस्य सहभागी रहेको कन्फ्रेन्स चेयर एजाज आलमले जानकारी दिए ।

रोटरी डिष्ट्रीक ३२९२ नेपाल भुटानका गभर्नर राजेन्द्र ध्वजुले कन्फ्रेन्समा रोटरीले संचालन गरेका परियोजना, ती परियोजनाले समुदायमा पारेको प्रभाव तथा आगामी दिनमा समुदायका लागि आवश्यक परियोजनाका बारेमा छलफल हुने जानकारी दिए ।

सम्मेलनमा लुम्बिनी प्रदेशका पुर्व मन्त्रीहरु भोजप्रसाद श्रेष्ठ,बिष्णु प्रसाद पन्थी लगायतले बोल्दै रोटरीले समुदायका लागि गरेको लगानीको प्रशंसा गरेका थिए ।