खोज

सल्यान, २७ फागुन । सल्यानको कालिमाटी गाउँपालिकामा यहि फागुन २८ र २९ गते कोभिड १९ विरुद्ध अतिरिक्त खोप दिइने भएको छ । १२ बर्ष माथिका करिव एक हजार ५०० जनालाइ बुस्टर डोज लगाउने लक्ष्य रहेको गाउँपालिकाले जनाएको छ । यस सन्दर्भमा शनिबार गाउँपालिका स्तरिय खोप समन्वय समिती, स्वास्थ्यकर्मी, खोप कार्यकर्ता लगायत सरोकारवालाहरुका लागि अभिमुखिकरण पनि सम्पन्न भएको कालिमाटी गाउँपालिकाका स्वास्थ्य शाखा प्रमुख गोरख थापाले जानकारी दिए ।

बुस्टर डोजले भविष्यमा आउन सक्ने सम्भावित लहरको क्षतिलाई न्यून गर्ने भएकाले कालिमाटीमा कोभिड विरुद्ध फाइजर खोपको अतिरिक्त मात्रा दिन थालिएको हो । कालिमाटी गाउंपालिकाका अध्यक्ष दान बहादुर केसीले आफ्ना नागरिकको स्वास्थ्य प्रती संवेदनशील रहेको भन्दै कोभिड विरुद्धको बुस्टर डोजले आगामी दिनमा हुन सक्ने जोखिमलाइ हटाउने बिश्वास व्यक्त गरे ।

सल्यानमा यस चरणमा ३ स्थानिय तहमा बुस्टर डोज दिन लागिएको स्वास्थ्य सेवा कार्यालयले जनाएको छ । कालिमाटी गाउँपालिकाको अभिमुखिकरण कार्यक्रममा स्वास्थ्य सेवा कार्यालय सल्यानका निमित्त स्वास्थ्य सेवा व्यवस्थापक डा। अभिषेक सिंहले कालिमाटी गाउँपालिका, सिद्धकुमाख गाउँपालिका र शारदा नगरपालिकामा यस चरणमा बुस्टर डोज लगाउन थालिएको जानकारी गराएका थिए ।

आफ्नो पालिकामा बुस्टर डोज अभियानलाइ प्रभावकारी रुपमा संचालन गरिने कालिमाटी गाउँपालिकाका सामाजिक बिकास समितिका संयोजक रवीलाल बस्नेतले जनाएका छन् ।