खोज

सुर्खेत, २८ फागुन ।

वीरेन्द्रनगर नगरपालिकाले भाडामा लगाएका सरकारी जग्गा खाली गर्न भनेपछि व्यवसायीहरु आन्दोलित बनेका छन् । पालिकाले आफुहरुलाई विकल्पविना नै जग्गा खाली गर्न लगाएको भन्दै उनीहरु आन्दोलित बनेका हुन् । वीरेन्द्रनगर वडा नम्वर ६ बजार क्षेत्र अन्तर्गत गोदाम लाइन, हङकङ बजार र हटिया लाइन क्षेत्रमा विभिन्न एक सय २५ पसल छन् । नगर विकास समितिको जमिन भाडामा लिएर साना व्यवसायीहरूले व्यापार गर्दै आइरहेका छन् ।

सुर्खेत उपत्यका नगर विकास समितिले सार्वजनिक जग्गामा पहुँचको भरमा बनाइएका संरचना हटाउन अन्तिम पटक चेतावनीसहितको सूचना माघ १७ गते निकालेको थियो । ३५ दिनभित्र संरचना हटाउन भन्दै जारी गरिएको सूचनामा भनिएको छ, ‘तोकिएको समयावधिभित्र पनि संरचना नभत्काई अटेर गरी बसेमा प्रचलित ऐन, कानुन, नियम र समितिको निर्णय अनुसार भत्काउन लाग्ने खर्च सम्बन्धित व्यक्ति तथा संस्थाबाट बेहोर्ने गरी संरचना भत्काइ जग्गा खाली गराउन समिति बाध्य हुने ब्यहोरा समेत यसै सूचनामार्फत जानकारी गराइन्छ ।’

गोदाम क्षेत्र, घण्टाघर लाइन तथा हटिया क्षेत्रमा रहेका सम्पूर्ण अस्थायी घर, टहरा, घुम्टी तथा अन्य संरचना हटाउने समितिको योजना छ । नगरपालिका (नगर विकास समिति) ले प्रकाशित सूचनाको समयावधि सकिएको दिनदेखि संरचना हटाउन भन्दै उक्त क्षेत्रमा माइकिङ गरिरहेको छ । फागुन ३० गतेसम्म संरचनाहरु नभत्काएको खण्डमा नगरपालिकाले आफै बल प्रयोग गरी संरचना भत्काउने चेतावनी समेत दिइरहेको छ ।

तर, व्यवसायीहरू आर्थिक मन्दीले सताइरहेको अवस्थामा तत्काल अन्यत्र जाने कुनै ठाउँ नरहेको भन्दै संरचना भत्काउन तयार छैनन् । व्यवसायीहरूले कम्तीमा दुई वर्षसम्म सम्झौता थप गरिदिनुपर्ने बताइरहेका छन् । उनीहरु पीडित व्यवसायी संघर्ष समिति गठन गरी आन्दोलनमा उत्रिएका छन् । ‘हामी जग्गा अतिक्रमणकारी होइनौँ, नगर विकास समितिले बसालेको हो र राज्यलाई कर तिरेका छौँ’ व्यवसायी दिलिपजंग शाही भन्छन्, ‘अतिक्रमण गरेको जग्गा २९ गतेभित्र खाली गर भनिरहेको छ, यो गलत हो । हामीलाई वर्षौं पहिले नगर विकास समितिले नै राखेको हो । यसरी राज्यले नै हामीमाथि अपमान गर्नु भएन ।’

बैंकको ऋण रहेको र पसल अन्यत्र लैजाँदा उधारो रकम समेत उठाउन कठिन हुने भन्दै साना व्यवसायीलाई विस्थापित गराउने कुरा राम्रो नभएको व्यवसायीहरुको भनाई छ । नगरपालिकाले सम्झौता र विकल्प दुवै नदिएको खण्डमा तालाचाबी लिएर नगरका मेयरलाई बुझाइने उनीहरूको भनाइ छ ।

नगर विकास समितिले गोदाम लाइन, हटियालाइन र हङकङ बजारका साना फेन्सी व्यवसायीलाई हटाइ उक्त क्षेत्रमा पार्किङ, पार्क निर्माण लगायतका संरचना बनाउने तयारी गरेको छ । तर, नगर विकास समितिले बारम्बार सूचना जारी गर्दा पनि व्यवसायीहरूले अटेर गरिरहेको जनाएको छ । नगरले दसैँ अगाडि नै सो स्थानबाट व्यवसायीलाई हटाउन खोजेको थियो । तर, दसैँतिहारमा व्यवसायीहरूलाई समस्या होला भनेर पछि हटेकोे नगर विकास समितिको भनाइ छ । अहिले ती संरचना हटाइ पार्किङ, पार्क लगायतका संरचना बनाउने योजना रहेको नगरप्रमुख मोहनमाया ढकाल बताउँछिन् । नगर विकास समितिका अध्यक्ष समेत रहेकी नगरप्रमुख ढकालले ३० गतेसम्म खाली गर्नुपर्ने बताउँछिन् । ढकालका अनुसार यस अघि पनि दुई पटक सार्वजनिक सूचना जारी भइसकेको छ ।