खोज

सुर्खेत, २७ फागुन ।

काँग्रेस सरकारबाट बाहिरिएसँगै कर्णाली सरकारको गठनका विषयमा चर्चा सुरु भएको छ । सरकार गठनसँगै प्रदेशको नेतृत्व कसले लिने भन्ने विषय सर्वत्र चासोको विषय बनेको छ । सत्ता समीकरण बदलिएसँगै कर्णाली प्रदेशको मुख्यमन्त्रीमा दुवै पार्टीले दावी गर्दै आएका छन् । यद्यपि यहाँको नेतृत्वको विषयमा केन्द्रको निर्णय कुरिरहेको अवस्था छ ।

माओवादीले हाल सरकारको नेतृत्व गरिरहेको अवस्थामा यही नेतृत्वमा सरकार गठन हुनुपर्ने दावी गरेको छ । यता एमालेले भने यसअघि पटक–पटक गठबन्धनबाट धोका पाएको भन्दै कुनै पनि हालतमा यो पटक नेतृत्व छाड्न नसकिने जनाएको छ । तसर्थ कसको नेतृत्वमा सरकार बन्छ भन्ने कुरा अहिले यसै भन्न सकिने अवस्था छैन ।

एमाले नेता यामलाल कँडेल २०७४ देखि नै मुख्यमन्त्री बन्ने दौडमा छन् । मुख्यमन्त्री बन्नकै लागि प्रदेशसभाको चुनाव लडेका उनी पार्टीभित्रैबाट असहयोग हुँदा मुख्यमन्त्री बन्न सकेनन् । २०७४ को चुनावमा एमालेको २० सिट हुँदा पनि पार्टीभित्रकै चार जना नेताले फ्लोर क्रस गर्दा प्रतिपक्षको भूमिकामा बस्नुप¥यो । तसर्थ यसपटक नयाँ गठबन्धनमा जसरी पनि एमालेले नै प्रदेशको नेतृत्व गर्न पाउनुपर्ने एमाले प्रदेशसभा संसदीय दलका प्रमुख सचेतक टेकराज पछाईंको भनाई छ ।

पछाईले माओवादी र कांँग्रेसले समेत सरकारको नेतृत्व गरेर परीक्षण भइसकेको भन्दै जनताले पनि एमालेको नेतृत्व हेर्न चाहेको दावी गरे । ‘काँग्रेस र माओवादीले सरकारको नेतृत्व असफल भइसकेको छ, अब एमालेले प्रदेशको नेतृत्व गर्नुपर्छ’ उनले भने, ‘कर्णालीका जनताले पनि एमालेको नेतृत्व हेर्न चाहेका छन् । नागरिकहरुको अपेक्षा पनि एमालेले नेतृत्व गरोस् भन्ने छ ।’ उनले यसपटक एमालेको नेतृत्वमा प्रदेश सरकार बनाउनको लागि केन्द्रसँग लबिङ भइरहेको पनि जानकारी दिए ।
्
यसअघि प्रदेश सरकारको दोस्रो कार्यकाल सुरु हुँदै गर्दा माओवादी र एमालेबीच आलोपालो सरकारको नेतृत्व गर्ने सहमति बनेको थियो । तर लगत्तै केन्द्रीय समीकरण बदलिएपछि एमाले प्रदेश सरकारबाटै बाहिरिएको थियो । त्यसकारण पटक पटक सरकारको नेतृत्व गर्नबाट पछि हटेको एमाले यसपटक नेतृत्व गर्न पाउनुपर्ने नेताहरुको अडान छ ।

यता मुख्यमन्त्री राजकुमार शर्मा भने आफ्नै नेतृत्वमा सरकार विस्तार हुने बताउँछन् । कसरी अगाडि बढ्ने भनेर केन्द्रको निर्णय पर्खिरहेको उनको भनाई छ । माओवादी कर्णालीका अध्यक्ष विमला शर्माले केन्द्रको निर्णय आईनसकेकाले प्रदेशमा कुनै पनि छलफल नभएको बताइन् । शर्माका अनुसार प्रदेशको नेतृत्व कसले गर्ने भन्ने विषयमा छलफल नभएता पनि माओवादीले नै नेतृत्व गर्ने दावी गरिन् । ‘यस विषयमा अहिलेसम्म छलफल भएको छैन’ उनी भन्छिन्, ‘माओवादीकै नेतृत्वमा प्रदेश सरकार अघि बढ्न सक्छ ।’