खोज

काठमाडौं,२६ फागुन । सवारी साधनमा आउंदो साउन महिनादेखि युरो ६ मापदण्ड लागू गर्न अर्थ मन्त्रालय र भौतिक पूर्वाधार तथा यातायात मन्त्रालयले सहमति जनाएका छन्। नेपालमा करिब १२ वर्षदेखि युरो ३ सँग समान नेपाल ३ मापदण्ड लागू भइरहेको छ। विश्वमा युरो ३ मापदण्डका गाडीको उत्पादन नै बन्द भएको छ ।

सरकारले युरो ३ बाट ४ मा नगई युरो ६ लागू गर्ने तयारी गरेको हो । वन तथा वातावरण मन्त्रालयलाई अर्थले युरो बीएस ६ बराबरको मापदण्ड लागू गर्न सहमति नदिँदा रोकिएको फाइल साउनबाट कार्यान्वयन गर्न राय दिएको हो।

अहिले अधिकांश सवारीसाधन युरो ६ मा उत्पादन भइरहेका छन्। वन तथा वातावरण मन्त्रालयले युरो ६ बीएस ६ मापदण्ड लागू गर्न करिब २ वर्ष अघिदेखि नै तयारी गरेको थियो। अटो व्यवसायीले बीएस ६ लागू गर्न २ वर्षको समय माग गरेका थिए। युरो मापदण्ड गाडीको प्रदूषण मानक हो।

युरो ३ को तुलनामा युरो ६ का गाडीले सबैभन्दा कम प्रदूषण गर्छन्। युरोपमा युरो ७ मापदण्डको तयारी भइसकेको छ।

निवर्तमान अर्थमन्त्री प्रकाशशरण महतले युरो ६ लागू गर्दा कतिपय गाडीको मूल्य बढ्ने हुँदा केही समय ढिला भएको बताएका थिए। तर उनले नै युरो ६ लागू गर्ने सहमति दिएर मन्त्रालयबाट विदा भएका छन्।

‘वातावरण मन्त्रालयले अब कानुनको सहमति लिएर मन्त्रिपरिषदमा पठाउने उनले जानकारी दिए।

‘अर्थ मन्त्रालयले सहमति नदिँदा लामो समय रोकिएको थियो। अहिले साउन १ गतेबाटै लागू गर्ने रायसहित पठाएको छ ।

अर्थले साउन १ गतेबाट लागू गर्ने राय दिए पनि अन्तिममा मन्त्रालयले मिति तोक्नेछ। वातावरणमन्त्री परिवर्तन भएकाले मन्त्रिपरिषद्मा कहिले लैजाने र कुन मितिबाट लागू गर्ने उनको निर्णयमा भर पर्छ।

अटोमोबाइल व्यवसायी समय दिएर युरो ६ लागू गर्नको लागि सहमत भइसकेका छन्। सरकारले मापदण्ड परिवर्तनको तयारी गर्दा व्यवसायीले पनि अहिले आयात प्रक्रियामा रहेकालाई छुट दिएर लागू गर्न सुझाव दिँदै आएका छन्। युरो ६ लागु हुंदा भारतबाट आयात हुने गाडीमा कुनै समस्या नहुने भए पनि तेस्रो मुलुकबाट आउने गाडीको मूल्य बढ्ने छ ।