खोज

बुटवल, २५ फागुन ।   रुपन्देहीको सैनामैना मुर्गियामा रहेको पर्रोहा बहुमुखी क्याम्पसको सञ्चालक समितिको अध्यक्ष पदका लागि स्वतन्त्र युवा उम्मेदवार नेत्र थापाले नेकपा एमालेका नेतालाई चुनौति दिएका छन् । २८ गते हुने चुनावका लागि अन्य पदमा एकल उम्मेदवारी परेपनि अध्यक्षमा भने स्वतन्त्ररुपमा युवा थापाले एमाले प्रदेश कमिटी सदस्य तथा क्याम्पसको सञ्चालक समिति अध्यक्ष खुशिराम चौधरीविरुद्ध उम्मेदवारी दर्ता गरेका छन् ।
शैक्षिक संस्थालाई राजनीति गर्ने थलो बनाइएको र दलहरुले भागबण्डा गरेर पालैपालो पद लिने तर काम नगर्ने परिपाटी तोड्न आफूले उम्मेदवारी दिएको थापाले तर्क गरे । वहुमुखी क्याम्पसमा एउटा संकाय मात्र चलाएर नहुने भएकाले अन्य संकायहरु थप्ने, दाताहरु खोजेर छात्रवृत्ति अक्षयकोषहरु स्थापना गरी विद्यार्थीलाई छात्रवृत्ति दिने लगायत काम गरी नमुना क्याम्पस बनाउन सक्ने भिजन आफुमा भएको थापाको भनाई छ ।

आफ्नो उम्मेदवारीबाट तर्सिएर एमाले लगायत दलका नेताहरुले आफ्नो उम्मेदवारीमा समर्थन गरेकालाई समर्थन फिर्ता लिन लगाउने काम भएको र उम्मेदवारी फिर्ताको मिति पटक पटक थप्दा आफूलाई जानकारी नगराइएको थापाले बताए । उनले शैक्षिक संस्थाको नेतृत्वमा दलका नेता आउन हुन्न स्वतन्त्र व्यक्ति आउनुपर्छ भन्ने धेरै विद्यार्थी र अभिभावकको मत रहेको दावी गरे । ‘उहांहरुलाई सैनामैना खानेपानीको केही हप्ता अघिको चुनावमा जस्तै परिणम उल्टिन्छ भन्ने डरले मलाई घेराबन्दी गरेका छन्’–थापाले भने ।

अध्यक्षका उम्मेदवार चौधरीले कोरोना महामारीका कारण सोचे जति काम गर्न नसकेको स्वीकार गर्दै क्याम्पसको भवन बनाउंदा लागेको ऋण तिर्नुपर्ने बीएचएम र बीबीए विषयको पढाई थप्ने तयारी भएकाले एक कार्यकाल दोहोरिन चाहेको बताए ।
२०६७ सालमा स्थापना भएको क्याम्पसमा अहिले बीबीएस कक्षा मात्र सञ्ञचालन भइरहेको छ । ४ सय विद्यार्थी रहेको क्याम्पसमा ३८५ जना मतदाता रहेका छन् ।
क्याम्पस सञ्चालक समिति सदस्यमा मन्जु ज्ञवाली,सरस्वती पोखरेल पन्थी,चन्द्रकान्त पाण्डेय,धनबहादुर कार्की र प्रेमकुमार शर्माको एकल उम्मेदवारी परेको छ । क्याम्पसमा बीबीएस विषय मात्र सञ्ञचालनमा छ ।